АЛЕКСЕЙ АВҒОНОВ: «ПИЁДА БА ҲАҶ МЕРАВАМ»

Шаҳрванди 70-солаи Тоҷикистон Алексей Авғонов, ки дар Русия зиндагӣ мекард, 5 ҳазор километр роҳро тай карда, пиёда аз Рязани то Душанбе омад. Ӯ давоми шаш моҳ дар роҳ буд ва мегӯяд, ки вақте аз Москав берун мешудам, 104-килограмм вазн доштам, ҳоло ҳамагӣ 87-килограмм. Алексей афзуд ин сафари худро ба 65- солагии Ҷашни Ғалаба ва 19 солагии Истиқлолияти Тоҷикистон бахшидааст.

Вай аз байни ҷангалзорҳои анбӯҳи Русия даштҳои бекарони қазоқ ва аз марзи Қирғизистон гузашта ба Тоҷикистон расидааст. Аз роҳравии зиёд дасту пойҳоям обила кардаанду чор ҷуфт пойафзолро дарронидам-мегӯяд Алексей. Аммо ман аз мушкилӣ наметарсам. Муҳим он аст, ки боз ба ман насиб гашт, ки аз ҳавои ҷонбахши Ватанам нафас бигирам. Ба хотири оне, ки дубора ба кишвари худ бирасӣ, месазад, ки ҳатто милёнҳо фарсах роҳро пиёда тай намоӣ-андеша дорад ӯ.

Ӯ орзу дорад баъди ду соли дигар боз пиёда ба сафар барояд. Фарзанди волидайне, ки яке мусулмон ва дигарӣ насронӣ ҳастанд, ҳамакнун мехоҳад ба Макка ва Байтулмуқаддас сафар карда, дар ҳаққи ҳама мусулмонону насрониҳои дунё дар мавзеъҳои муқаддас дуо бикунад.

Муродов Баҳманёр, «ИмрӯзNews»