Роғун

КРОЛ: АМРИКО МУНТАЗИРИ НАТОИҶИ БОЗРАСИИ ТАРҲИ "РОҒУН" АСТ

Сафири Амрико дар Ӯзбакистон гуфтааст, ки кишвараш мавзеъгирии худро дар қиболи тарҳи “Роғун” танҳо баъд аз анҷоми бозрасии коршиносони Бонки Ҷаҳонӣ эълом хоҳад кард. Тибқи иттилоъи расонаҳои гурӯҳӣ, Ҷорҷ Крол, сафири Амрико дар Ӯзбакистон, ин матлабро рӯзи панҷшанбеи 26 январ дар як нишасти матбуъотӣ дар Тошканд эълом кардааст.

Хабаргузории CA-NEWS аз қавли оқои Крол навиштааст, ки Амрико мунтазири натоиҷи бозрасии ин тарҳ аз сӯйи коршиносони Бонки Ҷаҳонӣ аст. Оқои Крол гуфтааст: “Танҳо баъд аз эъломи натоиҷи ин бозрасӣ ва бо дарназардошти муҳтавои он мо ба натиҷае хоҳем расид, ки иҷрои ин тарҳ зарурӣ аст ё хайр.”

Ин дар ҳолест, ки дар авохири моҳи октябри соли гузашта вазири хориҷаи Амрико зимни як суханронӣ дар Душанбе бо ишора ба тарҳи сохтмони нерӯгоҳи “Роғун” гуфта буд, ки иҷрои тарҳҳои даҳаи 1970 чандон судовар ё муассир нестанд. Вай ҳамчунин гуфт, ки давлати Тоҷикистон бояд ба натоиҷи пажӯҳиши коршиносони мустақил гӯш бидиҳад.

Хонуми Клинтон афзуд: “Вале натоиҷи ин пажӯҳиши Бонки Ҷаҳонӣ набояд барои давлати Тоҷикистон ҳарфи ниҳоӣ бошад. Давлати Тоҷикистон бояд танҳо бар пояи манофеъи миллии худ тасмим бигирад.”

Аз сӯйи дигар, вазири хориҷаи Амрико ҳушдор дод, ки Тоҷикистон набояд танҳо ба хотири мухолифат бо Ӯзбакистон ба иҷрои ин тарҳ иқдом кунад. Вай гуфт бояд имкони истифода аз манобеъи олтернотиви энержиро низ баррасӣ кард.

Дар ҳамин ҳол, Низомиддин Зоҳидов, муъовини вазири хориҷаи Тоҷикистон, рӯзи ҷумъаи 27 январ дар як нишасти матбуъотӣ дар Душанбе таъкид кард, ки давлати ин кишвар ба таъаҳҳудоти худ бо Бонки Ҷаҳонӣ содиқ аст ва бидуни анҷоми бозрасии ин тарҳ ба сохтмони он оғоз нахоҳад кард.

Ин дар ҳолест, ки то ҳол мавзӯъи азсаргирии сохтмони нерӯгоҳи “Роғун” норӯшан боқӣ мондааст. Кишварҳои поёноби рӯдхонаи Омӯ, аз ҷумла Ӯзбакистон, бо иҷрои ин тарҳ мухолифат карда ва иддаъо доранд, ки “Роғун” ба мушкилоти ҷиддии зистмуҳитӣ дар минтақа доман хоҳад зад.

Давлати Тоҷикистон умури бозсозӣ дар маҳалли нерӯгоҳи “Роғун”-ро идома медиҳад ва мунтазири натоиҷи бозрасии мустақиллонаи ин тарҳ аз сӯйи коршиносони Бонки Ҷаҳонӣ аст. Вале бархе аз соҳибназарон мегӯянд, ки ба эҳтимоли зиёд натоиҷи ин бозрасӣ барои Тоҷикистон хушоянд нахоҳад буд.

Ба ин далел, дар авохири соли гузашта бархе аз коршиносон иддаъо доштанд, ки давлати Тоҷикистон набояд мунтазири натоиҷи ин бозрасӣ шавад ва дар моҳи декабр бояд маҷрои рӯдхонаи Вахш дар маҳалли сохтмони ин нерӯгоҳро бубандад.

Вале Президент Раҳмон дар авохири соли гузашта дар дидор бо намояндаи Бонки Ҷаҳонӣ аз содиқ будани кишвараш ба таъаҳҳудоташ ба ин созмони байналмилалии молӣ дар заминаи “Роғун” изҳори назар кард ва дар ҷаласае ба тақвияти “умури бозсозӣ дар ин нерӯгоҳ” дастур дод.

Баъд аз ин, телевизиюнҳои Тоҷикистон зуд-зуд аз раванди корҳои сохтмонӣ “дар ин иншоъоти (таъсисоти) барои миллат сарнавиштсоз” гузориш пахш мекунанд. Гузоришҳое, ки то ду сол қабл дар замони фурӯши саҳоми ин нерӯгоҳ шабу рӯз пахш мешуданд.

Вале фурӯши “иҷбории” ин саҳом бо дархости созмонҳои байналмиллалии молӣ, аз ҷумла, Сандуқи Байналмиллалии Пул, мутаваққиф шуд ва барои муддате пахши гузоришҳо аз раванди умури сохтмонӣ дар ин нерӯгоҳ низ дар телевизиюнҳои Тоҷикистон мушоҳида нашуд.

Би-Би-Си