-Посухи қотеъ ба саволи аввалатон. Гумон мекунем ин як худфиребӣ аст. Ҳолате нашудааст, ки нашъамандро бо тавсияи истеъмоли дигар намуди маводи нашъадор табобат карда бошанд. Вале барномаҳои паст намудани ҳолати нашъамандӣ, аз ҷумла метадон вуҷуд дорад, ки қарор аст дар ҷумҳурии мо низ таҷриба шавад. Азбаски метадон як барномаи муҳим ва мавриди баҳс аст, наметавон дар як посухи кутоҳ ҳама ҷанбаҳои онро баҳс кард. Шояд замоне мо муфассалтар дар ин бора суҳбат кунем.

Дар мавриди саволи дуюматон бояд бигӯям, ки нишонаҳои ошкоре ҳастанд, ки шумо метавонед пай баред. Диққат диҳед: баъди истеъмоли марихуана, ки шумо онро "алаф" номидед, чашмон ва рухсораҳояш сурх мешаванд, серҳаракатӣ дар ӯ мушоҳида мегардад, зиёд ва беҳуда механдад…инҳо нишонаҳое мебошанд, ки ҳар кас зуд эҳсос мекунад. Вале роҳи осонтар ва дақиқтараш гузаштан аз тест аст. Санҷиши тестӣ зуд ошкор мекунад. Агар дӯстатон саркашӣ кард, пас Шумо метавонед хулоса бароред, ки тахминатон дуруст аст.

Эътимодномаи сафирон чӣ гуна қабул карда мешавад?

Дар шабакаҳои телевизионӣ мебинем, ки сафирон ба Президент эътимоднома месупоранд. Ва тақрибан як саҳна нишон дода мешавад. Инро чӣ хел фаҳмем?

Бобокалон Ниёзмуҳаммадов, Душанбе

Тавре аз Вазорати корҳои хориҷии кишвар посух доданд, ҳама эътимодномасупориҳо тибқи протокол сурат мегиранд. Рӯзи баргузории маросими супоридани эътимодномаҳо ба Президенти Ҷумҳурии Тоҷикистон сафирони навтаъиншудаи кишварҳои хориҷиро (бо ҳамсаронашон) корманди масъули Раёсати ташрифоти давлатии Вазорати корҳои хориҷии Ҷумҳурии Тоҷикистон дар автомашинаи махсус ҷудошуда аз меҳмонхона-қароргоҳи сафир ё сафорат то МД "Қасри Миллат" ҳамроҳӣ менамояд.

Ба ифтихори сафирони кишварҳои хориҷӣ дар даромадгоҳи марказии МД "Қасри Миллат" афсарони Горди фахрии Гвардияи миллӣ аз ду тарафи роҳрави қолинӣ саф мекашанд. Сафирони навтаъингардидаи кишварҳои хориҷиро дар назди даромадгоҳи марказии МД "Қасри Миллат" Сардори Раёсати ташрифоти давлатии Вазорати корҳои хориҷии Ҷумҳурии Тоҷикистон истиқбол мегирад ва аз тариқи зинапояҳои асосӣ ба дохили бино даъват намуда, то толори интизорӣ ҳамроҳӣ мекунад. Ҳайати ҳамроҳикунандаи сафирон бо ҳамроҳии намояндаи Раёсати ташрифоти давлатӣ тавассути даромадгоҳи паҳлӯӣ (канорӣ) ба "Қасри Миллат" дохил шуда, ба толори интизорӣ ворид мегарданд.

Дар вақти муайяншуда Президенти Ҷумҳурии Тоҷикистон ба толор ворид гардида, барои оғози маросим ҷои махсуси муқарраргардидаро ишғол мекунад. Дар толор парчами давлатии Ҷумҳурии Тоҷикистон ва ливои Президенти Ҷумҳурии Тоҷикистон гузошта мешаванд. Зимни маросими супоридани эътимодномаҳо ба Президенти Ҷумҳурии Тоҷикистон, Вазири корҳои хориҷӣ (аз тарафи рост) ва Мушовири давлатии Президенти Ҷумҳурии Тоҷикистон оид ба сиёсати хориҷӣ (аз тарафи чап) иштирок мекунанд. Номи пурра ва мақоми сафири навтаъингардида бо забонҳои тоҷикӣ ва англисӣ эълон карда мешавад.

Сипас, сафир ба назди Президент омада, дар ҷойи муқарраргардида қарор мегирад ва бо таъзими андак эҳтиромро ба ҷо оварда, паёми роҳбари давлати худро оид ба таъини ӯ ба ҳайси сафир мухтасар қироат мекунад (тарҷума таъмин карда мешавад). Ва баъд  эътимодномаи худ ва номаи бозхонди сафири собиқро ба Президенти Ҷумҳурии Тоҷикистон супорида, бо роҳбари давлат дастфишӯрӣ мекунад ва барои гирифтани акси хотиравӣ аз тарафи рости Президент ҷой мегирад. 

Баъди гирифтани акси хотиравӣ барои иштирокчиёни маросим қадаҳи шампон пешниҳод мегардад ва сӯҳбати Президент бо сафирон сурат мегирад. Сипас Президенти Ҷумҳурии Тоҷикистон толорро тарк менамояд ва сафирон барои изҳороти матбуотии кӯтоҳ ба намояндагони васоити ахбори омма даъват мешаванд (ихтиёран). Тартиби гусел мисли маросими истиқбол дар МД "Қасри Миллат" сурат мегирад. Ин аст, ки саҳнаҳои телевизионӣ якранганд, зеро маросим бо ҳамин як низом амалӣ мешавад.

Театри Шекспир дар Лондон аст

Уилям Шекспирро бузургтарин дарамманависи олам медонанд. Мехостам донам, ки оё барои абадияти хотири ин шахсияти мондагор театре ё иншооти дигаре вуҷуд дорад?

Гулниссо Одинаева, Ваҳдат

Бале, дар ватани Шекспир театре бо номи "Глобус" вуҷуд дорад, ки онро "Глобус"-и Шекспир меноманд. Ҳарчанд бо ин бузургӣ шарт ҳам нест, ки барои абадияти номи ин драматурги барҷаста театре бошад. Чуноне медонем, шояд дар олам ягон театре вуҷуд надошта бошад, ки рӯ ба шоҳасарҳои ӯ наоварда бошад. Дар як худи Тоҷикистони мо шояд бештар аз даҳ асари ӯ ба саҳна гузошта шуда бошд.

Театри "Глобус" тибқи меъмории асри 16 сохта шудааст ва ончунон назаррабост, ки зуд бинандаро мафтун мекунад. Онро як нафаси зиндаи таърих меноманд. Табиист, ки тӯли бештар аз 4 аср бинои собиқи он куҳнаву фарсуда шуд. Вале ҳамагӣ ба масофаи 300 метр дуртар аз он бинои нави он бо ҳамон меъмории асри Шекспир бунёд гардид.  

Булаҷабҳои рӯзгори Алла Пугачёва

Оё дуруст аст, ки сарояндаи шинохта Алла Пугачёва, ки 65-сола шуд, панҷ маротиба шавҳар кардааст? Боварам намеояд.

Субҳонҷон Алиёров, Хоруғ

Дуруст аст. Алла Пугачёва, ин сарояндаи пуровозаи рус тӯли умри худ 5 маротиба издивоҷ кардааст. Аввалин маротиба дар бистсолагӣ ва охирин бор дар 62-солагӣ ба шавҳар баромадааст. Шавҳари охирини ӯ ҳаҷвнигор Максим Галкин буд, ки замони издивоҷ бо Аллаи 62-сола 35 сол дошт. Ҳоло ин ду тан бо ҳам зиндагонӣ мекунанд. Аммо дар ҳаёти Алла Пугачёва рӯйдодҳои ҷолиб зиёданд. Чунончӣ, хуношомтарин маняки замони Шӯравӣ Анатолий Нагиев орзуи қатли Пугачёваро бо худ ба гур бурд. Вале вай барои расидан ба ҳадаф ба ҳадде кӯшид, ки 6 зани ба симо монанд ба Пугачёваро қатл кард. Аммо баъдан боздошт ва бо ҳукми суд парронда шуд.

Ҳамчунин, Пугачёва аввалин сарояндаест, ки баъди садамаи Чернобил дар ин мавзеъ бо барномаи густардаи ҳунарӣ баромад кардааст. Соли 2005 ҷоизаи шахсии худро бо номи "Ситораи тиллои Алла" таъсис кардааст, ки ба сарояндагон ва мусиқинавозони бомаҳорат эъто мегардад. Ба ҷуз медали тилло ба ғолибон аз 10 то 50 ҳазор доллари амрикоӣ мукофот дода мешавад. Соли 2009 хонаи истиқоматии ӯ 500 метри квадратӣ масоҳат дошт, илова бар ин дар берунтари Маскав 50 сотих заминро низ харидаву аз худ карда буд.

Домоди пешини Пугчёва сарватманди чечен Руслан Байсаров буд, ки моҷароҳое барои фарзанди духтараш бо ӯ дошт. Ҳафт сол пайи ҳам бино ба таҳқиқоти Forbes Пугачёва дар радифи чоргонаи машҳуртарин занони Сайёра ҷой гирифтааст. Тибқи иттилои ҳамин маҷалла соли 2011 Пугачёва соҳиби бештар аз 4,8 миллион доллар шудааст. Дар бораи ҳаёт ва эҷодиёти Алла Пугачёва 31 филми ҳуҷҷатӣ ба навор гирифта шудааст.

Бознашр аз ҳафтаномаи «Рӯзгор» №16, 23 апрели соли 2014