"POYRY" БАРАНДАИ МУЗОЯДАИ ТАРҲИ ЭКОЛОГИИ "РОҒУН"

Барои тарҳрезии барномаи экологии нерӯгоҳи Роғун ширкати "Poyry Energy Ltd"-и Шветсария баргузида шудааст. Музояда дар ин бора даҳуми декабри соли 2010 баргузор шуда буд.

Ин дар ҳолест, ки барномаи фаннӣ ва иқтисодии нерӯгоҳи Роғунро се ширкати дигар - "Coyne et Bellier Consulting Enggineers"-и Фаронса, "Electroconsult" - и Итолиё ва "IPA Energy Water Consulting"-и Бритониё ба ӯҳда доранд. Тарҳрезии барномаи фаннию иқтисодӣ ва ҳамчунин барномаи зистмуҳитиву иҷтимоии нерӯгоҳи "Роғун"-ро Бонки Ҷаҳонӣ сармоягузорӣ мекунад. Ахиран Бонки Ҷаҳонӣ иддаои Узбакистон дар бораи баргузории ташхиси зистмуҳитии нерӯгоҳи Роғун аз сӯи ин ҷумҳуриро рад карда, гуфтааст, барои баргузории ҳамчунин экспертиза ҳоҷате нест.

Ба ин далел, ки Бонки Ҷаҳонӣ ин корро бо ҷалби мутахассисони байналмилалӣ анҷом хоҳад дод ва он иддаоҳое, ки Узбакистон дорад, аз сӯи коршиносони байналмилалӣ низ дар тарҳрезии ин барнома мавриди назар қарор хоҳад гирифт. Бонки Ҷаҳонӣ ва давлати Тоҷикистон дар бораи баргузории экспертизаҳо ва сармоягузории он аз сӯи консорсиюми байналмилалӣ қарордод имзо кардаанд.

Бонки Ҷаҳонӣ гуфтааст, дар сурати ба нафъи Тоҷикистон ҳал шудани натиҷаи экспертизаи зистмуҳитӣ ин бонк барои сохтмони нерӯгоҳи Роғун ба Тоҷикистон дар дарёфти кӯмакҳо ҳамкорӣ хоҳад кард. Мақомот мегӯянд, дар ҳоли ҳозир дар нерӯгоҳи Роғун корҳои барқароркунӣ идома дорад. Коршиносон тахмин мезананд, ки барои мавриди баҳрабардорӣ қарор додани ду агрегати ин нерӯгоҳ ҳудуди ду миллард доллар зарур аст.

«Озодӣ»