Барои ҳалли ин мушкил давлат тасмим гирифтааст, ки қисмҳои эҳиётӣ ва таҷҳизоти заруриро тавассути ҳавопаймо ва аз тариқи қаламрави Афғонистон ба Тоҷикистон ворид кунад. Оқои Шулашов рӯзи ҷумъаи 19 ноябр дар сӯҳбате телефунӣ бо Би-би-сӣ гуфт, ки дар чанд моҳи ахир мизони анҷоми умури сохтмонӣ дар маҳалли нерӯгоҳи “Роғун” ба таври қобили мулоҳизае коҳиш ёфтааст. Вай афзуд: "Бархе аз нақшаҳои мавриди назари мо иҷро нашуданд. Сабаби ин амр нарасидани қисмҳои эҳтиётӣ аст. Масалан, мо ба чархҳои бузурги комюнҳои “БелАЗ” ниёз дорем, вале Ӯзбакистон намегузорад, ки вогунҳои ҳомили ин колоҳо ба Тоҷикистон ворид шаванд."

Оқои Шулашов аз анвоъи дигари масолеҳ ва таҷҳизот ном бурд, ки ҳоло ширкати “Нерӯгоҳи Роғун” барои анҷоми умури сохтмонӣ ба онҳо шадидан ниёз дорад. Дар авоили моҳи гузашта масъулони ширкати "Роҳи оҳани Тоҷикистон" изҳор доштанд, ки Ӯзбакистон бархе аз вогунҳои ҳомили коло ва мавод, аз ҷумла чархҳои комюнҳо барои нерӯгоҳи “Роғун”-ро раҳо кардааст.

Вале Нурулло Шулашов ин иддаъоро рад кард ва гуфт, ки тақрибан аз авоили соли ҷорӣ то кунун Ӯзбакистон ба ҳеҷ як вогуни ҳомили коло ва мавод барои нерӯгоҳи “Роғун” иҷозаи убур ба Тоҷикистонро надодааст. Зимнан, дар тобистони соли ҷорӣ дар дидори Президент Раҳмон бо Ислом Каримов, раиси ҷумҳури Ӯзбакистон, дар шаҳри Тошканд тавофуқ шуда буд, ки ин кишвар дигар аз тронзити вогунҳои Тоҷикистон монеъ намешавад. Вале мақомоти расмӣ таъкид карда буданд, ки ин муқаррарот ба вогунҳои ҳомили коло ва мавод барои нерӯгоҳи “Роғун” рабт надорад.

Оқои Шулашов дар посух ба ин суол, ки оё роҳи ҳалли ин мушкил вуҷуд дорад, гуфт, ки ҳоло ниҳодҳои зирабт машғули баррасии ин мавзӯъ ҳастанд. Вай афзуд: "Тасмим шуд, ки коло ва маводди мавриди ниёзи мо тавассути ҳавопаймо ва аз роҳи заминӣ аз тариқи қаламрави Афғонистон ворид карда шаванд. Албатта, ин амр қимати коло ва таҷҳизот барои сохтмони нерӯгоҳро бамаротиб гарон месозад. Вале мо роҳи бозгашт надорем."

Ӯзбакистон пайваста бо сохтмони нерӯгоҳи “Роғун” шадидан мухолифат кардааст. Ба эътиқоди мақомоти ин кишвар, дар сурати бунёди ин нерӯгоҳ, Ӯзбакистон бо камбуди об рӯбарӯ хоҳад шуд. Ҷониби Тоҷикистон ин иддаъоро рад мекунад ва изҳор медорад, ки обанбори “Роғун” аз ҳисоби саҳми ин кившар аз оби рӯдхонаҳои фаромарзӣ пур карда хоҳад шуд. Бо ин вуҷуд, давлати Тоҷикистон бо бозрасии байналмилалии тарҳи нерӯгоҳи “Роғун” мувофиқат кардааст. Ахиран дар озмун барои интихоби ширкати бозраси ин тарҳ ширкатҳои “Coyne et Bellier Consulting Engineers” аз Фаронса, “Electroconsult” аз Итолиё ва “IPA Energy Water Consulting” аз Бритониё пирӯз шудаанд ва барои анҷоми ин амр як кунсерсиуми байналмилалӣ ташкил хоҳад шуд.

Интихоби ширкате, ки асароти зистмуҳитии тарҳи “Роғун”-ро бозрасӣ хоҳад кард, то авосити моҳи оянда ба таъхир гузошта шудааст. Нурулло Шулашов хабар дод, ки қарор аст то авохири соли ҷории мелодӣ бозрасон дар маҳалли сохтмони нерӯгоҳи “Роғун” ба кор оғоз кунанд. Вай афзуд, ки тибқи тавофуқоти давлати Тоҷикистон бо созмонҳои молии байналмилалӣ, то анҷоми бозрасии молӣ, фаннӣ ва зистмуҳитии тарҳи “Роғун” дар ин нерӯгоҳ ҳеч умури нави сохтмонӣ, ба ҷуз умури бозсозии таъсисоти мавҷуда, анҷом нахоҳад шуд.

Ба ин далел, замони бастани маҷрои рӯдхонаи Вахш дар маҳалли сохтмони садди обанбори ин нерӯгоҳ ҳанӯз мушаххас нашудааст. Ахиран дар сойти интернетии Вазорати молияи Тоҷикистон хабаре мунташир шуд, ки тибқи он ҳазинаи куллли сохтмони нерӯгоҳи "Роғун" 2,3 милёрд дулор пешбинӣ шудааст. Аммо коршиносон мӯътақиданд, ки ҳазинаи ин тарҳ бамаротиб бештар аз ин рақам хоҳад буд.

Би-Би-Си

Адреси доимии маводи мазкур: http://www.ruzgor.tj/rogun/3615-2010-11-19-08-22-54.html