ҚУРЪОНСИТЕЗӢ ДАР АМРИКО

Дирӯз, 13.09.10, ба муносибати нуҳумин солгарди ҳодисаҳои11-уми сентябр , гурӯҳи кӯчаке аз масеҳиёни тундгаро дар назди  Қасри сафеди Амрико ба пора кардани Қуръон даст заданд. Ба иддаои онҳо ислом дини дурӯғин будааст. Ронадол Терӣ як узви ин гурӯҳи шаш нафара гуфт:  «яке аз сабабҳои  қиём кардани мо бахотири он аст, ки ибораи «Ислом дини мусолиматомез аст» бояд боз дошта шавад. Ба иттилои сомонаи www.nassej.соm, Андрей Беком, як тани дигар аз ин гурӯх, ба тиловати даҳҳо ояти Қуръон машғӯл шуда, чунин гуфтааст: «Инҳо бадбиниро нисбати яҳуду насоро тарғиб мекунанд» ва сипас саҳифаҳои Қуръони бо тарҷимаи англисӣ дар дасташ бударо пора-пора кардааст. Ба иттилои ин манбаъ, ин қуръонпоракунӣ дар ҳузури 20-тан аз журналистон сурат гирифта, таваҷҷӯҳи даҳҳо сайёҳро низ ҷалб кардааст. Полиси маҳал низ дар масофаи чанд метр дуртар истода ин амали  ширкаткунандагонро сабт кардааст.

Қуръонпоракунӣ дар ҳоле ба анҷом расид, ки Амрико аз нуҳумин солгарди ҳодисаҳои Ню Йорк  ёд мекард ва Террӣ Ҷонс-роҳиби ифротии калисое дар Флорида, мардуми кишварашро дар ин рӯз ба қуръонсӯзӣ даъват карда буд. Раиси ҷумҳури Амрико, Борак Обома, низ нороҳатии худро баён карда гуфта буд, ман ашхосеро дидан намехоҳам, ки бо рафторҳои номақбули худ, ҳаёти амрикоиҳоро дар хатар мегузоранд.

Дар ҳамин ҳол духтари Терри Ҷонс, ки дар айни замон дар Олмон ба сар мебарад, дар мусоҳиба бо рӯзномаи олмонии Шпигел гуфт: “Падарам ақлашро аз даст додааст ва ниёз ба кӯмак дорад”. ӯ дар идома афзуд: “Барои падарам емайл фиристодам ва ӯро тарғиб кардам, ки аз тарҳи хеш барои сӯзондани Қуръон даст бикашад, ки албатта ҳеҷ ҷавобе ба ин паёми ман надод”.

Вай бо ишора ба давраи ҳузури падараш дар Олмон чунин гуфтааст: “Аслан, рафторҳои падарам ҳеҷ иртиботе бо Инҷил надорад, падарам аз назари динӣ як фарди гумроҳи воқеӣ аст ва ба хотири баъзе корҳояш дар соли 2008 аз Олмон ихроҷ шуд ва ба Иёлоти Муттаҳидаи Амрико баргашт. Умедворам аз роҳе, ки пеш гирифтааст, бозгардад”.

Ҳамзамон, расонаҳои ахбори умум амалиёти эътирозгарони ИМА-ро аз чаҳорчӯби қонунҳои амалкунанда берун унвон карда навиштаанд, ки амрикоиҳо бо таҳрики ду роҳиби калисо ду нусха  аз китоби Қуръонро ба оташ кашидаанд. Ин амал дар Тенис рух дода, тибқи иттилои манобеи мазкур, лаҳзаҳои гуногуни сӯзонидани Қуръон дар Ню Йорк, Канзас ва дуртар аз Қасри Сафед мушоҳида карда шудааст.

Дар ҳамин ҳол «Форснюс» бо такя ба пойгоҳи интернетии «Маркази иқдоми байнулмилалӣ» навиштааст, ҳамзамон бо нуҳумин солгарди ҳамалоти ёздаҳуми сентябр ҳазорон нафар аз мардуми шаҳри НюЙорки Амрико дар ҳамоише бо унвони «Иттиҳод ва ҳамбастагӣ» алайҳи нажодпарастӣ ва иҳонат ба ислом тазоҳурот карданд. Теъдоди ширкаткунандагон дар ин тазоҳурот ба даҳ ҳазор нафар расида, хеле бештар аз эътирозот ахири зидди давлатӣ дар Амрико арзёбӣ шудааст.

Амруллоҳи Низом, «ИмрӯзNews»