МАНИЖА ДАВЛАТ: «МАН ГАПИ РОСТРО ГУФТАМ»
«ИмрӯзNews» дар шумораи нахустини худ (30.08.10) дар мусоҳибаи кӯтоҳе бо Манижа Давлат, овозхони маъруф, муждаи бо суруди «Ай Ватан» ба саҳнаи мусиқӣ баргаштанашро ба мухлисони сершумораш расонда буд. Хабари мазкур, ба хусус таронаи «Ай Ватан», ки аз тариқи радиои «Имрӯз» такрор ба такрор тӯли ин рӯзҳо пахш мегардид, дар як муддати кӯтоҳ вокунишҳои мухталиферо ба бор овард. Аксаран онро яке аз беҳтарин сурудҳои Манижа Давлат хонданд.
Видеоклипе, ки бо истифода аз аксҳои Манижа Давлат дар асоси ин тарона аз тарафи кормандони сомонаи «Рӯзгор» таҳия шудааст, сертамошобинтарин видеоклипи овозхонҳои тоҷик дар ҳафтае, ки сипарӣ шуд, ба ҳисоб меравад. Онро дар муддати як ҳафта беш аз 1100 нафар алоқамандони садои ин овозхони шинохта аз тамоми гӯшаву канори дунё тариқи торнома тамошо карда, бархе аз ин бозгашт ва таронаи нави Манижа ибрози хурсандӣ намуда, андешаҳои худро дар ҳошияи ин хабар навиштаанд.
Ва аммо дар айни ҳол дар ҳафтаномаи «Зан ва мард» рӯзи 07.09.10 овозхони ҷавоне бо номи Гулрӯ Табарова таҳти унвони «Манижа, дигар дурӯғ нагӯ» ин овозхони маъруфро ба дурӯғгӯӣ муттаҳам кардааст. Ба қавли Табарова оҳанги суруди мазкур, на эҷоди Манижа Давлат, балки моли Бахтиёри Бегиҷон ном танзимгаре будааст ва матни шеър низ бархилофи гуфтаи Манижа аз эҷодиёти даҳанакии халқ набуда, балки маҳсули тафаккури як шоири муосири афғон бо номи Абдуманнони Ҳамдил мебошад.
Чун дар навиштааш Гулрӯ Табарова аз мусоҳибаи дар рӯзномаи «ИмрӯзNews» намудаи Манижа Давлат ёдовар шудааст, мо лозим донистем, ки бори дигар ба Манижа Давлат муроҷиат карда, фикри ӯро дар бораи ин қазия пурсон шавем.
-Бо арзи салом Манижабону. Оё аз навиштаи овозхони ҷавон Гулрӯ Табарова дар ҳафтаномаи «Зан ва мард», ки Шуморо ба дурӯғгӯӣ муттаҳам кардааст, хабар доред?
-Бале, хабар дорам.
- Нахуст мехостам бифаҳмем, ки чунин як овозхонеро Шумо мешиносед ва оё гуфтаҳои ӯ ҳаққанд?
- Бале, чунин овозхонро мешиносам. Вале ончи ӯ навиштааст, мулоимтар карда бигӯем, аз ҳақиқат дур аст. Ҳақиқат он аст, ки ман дар мусоҳибаам бо рӯзномаи шумо гуфта будам. Яъне оҳанги суруди «Ай Ватан» маҳсули эҷоди ман аст. Бахтиёри Бегиҷон, ки танзимгари хуб аст ва ман ҳурматаш мекунам, онро такмил дода буд, яъне ба қавли ҳунармандони имрӯза «оранжировка» карда буд. Ман ин оҳангро тақрибан як сол қабл ба Гулрӯ Табарова барои сурудан дода будам.
Рости гап, интизор доштам, ки Гулрӯхон сурудро тарзе мехонад, ки ба шунавандаи сершумор писанд меояд. Ман ба назар нагирифта будам, ки барои сарояндае, ки овозхониро нав-нав шурӯъ мекунад, хондани ин суруд камтар вазнинтар аст. Аз ин рӯ барои ин ки суруд «хоб накунад» ман худам низ онро иҷро кардам. Устоди ман Зикруллоҳ Ҳакимов бароям оҳангҳои зиёде эҷод намудааст. Имрӯз аксари ин оҳангҳоро худи ӯ низ мехонад.
Ман ҳақ надорам бигӯям, ки чаро ӯ ин корро мекунад. Аз сӯйи дигар суруд дар бораи Ватан аст. Бигузор онро Гулрӯ бихонад, ман бисароям, дигарон бихонанд. Ватан аз ҳамаи мост. Бубинед, суруди «Қасам»-ро аз хурд то калон мехонанд. Касе нагуфтааст, ки чаро онро ҳама мехонанд. Сурудҳои маро имрӯз дар Афғонистон ҳам мехонанду дар Эрону Покистон ҳам. Масалан, Меҳрдоди эронӣ суруди «Ёри рафта боз омад»-ро аз тариқи шабакаи телевизиони байналмилалии Перс-ТВ мехонад. Як зани дигар суруди «Чӣ мешуд азизам»-ро бо як клипи хеле диданӣ вориди албоми тозаэҷоди худ кардааст. Шабнами Сурайё суруди «Гардаму гардам»-ро мехонад.
Ман аз ин ифтихор мекунам, ки овозхонҳои номӣ сурудҳои маро месароянд. Хоҳари азизам Гулрӯхон, ин гуфтаҳои ман маънои онро надоранд, ки ман бо Шумо ҳамкориро қатъ карданӣ ҳастам. Агар хоҳиш дошта бошед, ман сурудҳои зиёде дорам, ки мувофиқи садои Шумо ҳастанд ва ман онҳоро ба Шумо тӯҳфа мекунам.
-Дар бораи муаллифи матни суруд чӣ мегӯед? Шумо онро моли эҷодиёти даҳанакии халқ гуфта будед, вале Гулрӯ Табарова далел пеш меорад, ки он моли шоири муосири афғон Абдуманнон Ҳамдил аст?
-Ҳарчанд Гулрӯхон мегӯяд, ки ин шоир шеърашро бевосита ба ман додааст, вале бояд бигӯям, ки ман ин шоирро надидаам ва намешиносам. Ман аз сабаби он, ки муаллифи шеърро намедонистам ва он пеш аз он ки суруд шавад, хеле ҳам таҳрир хӯрда буд, онро дар сӯҳбат бо шумо моли халқ гуфтам. Агар баъди даровардани чунин тағйиротҳои ҷиддӣ бародари гиромӣ, оқои Ҳамдил даъво кунад, ки шеър ҳанӯз ҳам моли ӯст, ман бо ӯ мухолифат нахоҳам кард.
Султони Ҳамад, «ИмрӯзNews»
Адреси доимии маводи мазкур: http://www.ruzgor.tj/adabiyot-va-farhang/3102---l---r.html
Шарҳҳо
хами суруди падар ду кисм иборат хаст чаро шумо як кимашро баровардеду дигарашро набаровардед
Гар хирадманд аз авбош Чафое бинад,
То дили хеш найёзораду дархам нашавад.
Санги бекиммат агар косаи зарин шиканад,
Киммати санг найафзояду зар кам нашавад.
Ба Гулру гуфтаниам:
Чашмаи хушкидаи миннат ба дарё мекуни,
Мурдареги сарзаниш бо оби тилло мекуни?
RSS Обуна