Мадуро «БРИКС»-ро маркази нави ҷаҳони бисёрқутбӣ номид
Гурӯҳи “БРИКС” аллакай ба маркази ҷаҳони нави бисёрқутбӣ ва геополитика табдил ёфтааст, гуфт Николас Мадуро, раисиҷумҳури Венесуэла.
Шоми сешанбе ӯ барои нишасти сарони созмон вориди Қазон шуд.
"Мо омадем, ки умеди худро ба ҷаҳон бидуни мустамликадорӣ ва империализм мубодила кунем. Гурӯҳи “БРИКС” аллакай ба маркази ҷаҳони нави бисёрқутбӣ, геополитикаи нав, дипломатия ва сулҳ табдил ёфтааст" - гуфт раисиҷумҳури Венесуэла ба хабарнигорон.
Худи ҳодисаро сиёсатмадор таърихӣ номид. Вай инчунин изҳори умедворӣ кард, ки дар ин рӯзҳо бо президенти Русия Владимир Путин ва роҳбарони кишварҳои дигар сӯҳбат хоҳад кард.
Нишасти сарони “БРИКС” дар Қазон аз 22 то 24 октябр баргузор мешавад. Ин бузургтарин чорабинии сиёсати хориҷӣ дар Русия хоҳад буд. Тавре ёвари президент Юрий Ушаков гуфт, дар ин ҳамоиш 36 кишвари ҷаҳон (22-тои онҳо дар сатҳи олӣ) намояндагӣ мекунанд ва сарони шаш созмони байналмилалӣ низ хоҳанд иштирок намуд.
Путин дар чаҳорчӯби ин нишаст як силсила мулоқотҳои байналмилалӣ дар назар дорад. Имрӯз ӯ аллакай бо раисиҷумҳури Чин Сӣ Ҷинпин, сарвазири Ҳиндустон Нарендра Модӣ, президентҳои Африқои Ҷанубӣ ва Миср Сирил Рамафоса ва Абдулфаттоҳ ас-Сисӣ ва инчунин раиси Бонки нави рушд Дилма Руссефф мулоқот кардааст.
“БРИКС” як иттиҳодияи байнидавлатӣ аст, ки соли 2006 аз ҷониби Русия, Чин, Ҳиндустон ва Бразилия таъсис ёфтааст. Дар соли 2011 ба он Африқои Ҷанубӣ пайвастанд. Аз аввали соли 2024 Миср, Эфиопия, Эрон, АМА ва Арабистони Саудӣ ба ин гурӯҳ шомил шуданд. Рӯзи 1 январ Раёсати солонаи Русия дар ин созмон оғоз шуд, ки он таҳти шиори “таҳкими бисёрҷониба барои рушди одилона ва амнияти ҷаҳонӣ” баргузор мешавад.
