МЕДАЛИ НУҚРАИ ПАҲЛАВОНИ ТОҶИК ДАР КРАСНОДАР

Баҳодур Қодиров, паҳлавони ҷавони тоҷик, дар мусобиқаи байналмилалии гуштии озод барои дарёфти ҷоизаи Владимир Гусел, мураббии шоистаи Иттиҳоди Шӯравӣ, дар шаҳри Краснодари Русия барандаи медали нуқра шуд.

Муродалӣ Тешаев, сухангӯи Кумитаи миллии олимпии Тоҷикистон, бо эъломи ин хабар ба “Озодӣ” гуфт, Баҳодур дар рақобатҳо дар вазни то 74 кг бар чаҳор рақибаш ғолиб омад ва ба даври ниҳоӣ роҳ ёфт. Вале ӯ дар қувваозмоии ҳалкунанда мағлуб гашт. Ҷаноби Тешаев афзуд, аз 16-ум то 20-уми феврал дар шаҳри Гумми Кореяи Ҷанубӣ мусобиқоти қаҳрамонии Осиё дар риштаҳои гуштии озод ва юнониву румӣ миёни бузургсолон баргузор мешавад.

Дар ин мусобиқот Тоҷикистонро инҳо намояндагӣ хоҳанд кард: гуштии озод - Орзу Эмомов (55 кг), Фарҳоди Усмонзода(60 кг), Сомиршо Воҳидов (66 кг), Азамат Сӯфиев (74 кг), Юсуф Абдусаломов (84 кг), Рустами Искандар (96 кг)  ва Эраҷ Холов (120 кг), гуштии юнониву румӣ - Фахриддин Аланазаров (55 кг), Фаррух Беков (60 кг), Аҳмад Қодиров (66 кг), Азиз Қаландаров (74 кг), Манучеҳр Аллаев (84 кг), Ҳабибулло Абдуллоев (96 кг) ва Муродҷон Тӯйчиев (120 кг).

Нарзуллоҳи Латиф, «Озодӣ»