ҲИЗБИ НАҲЗАТИ ИСЛОМИИ ТОҶИКИСТОН ҚУРЪОНСӢЗИРО МАҲКУМ КАРД

Ҳизби наҳзати исломӣ (ҲНИТ), танҳо ҳизби расмии мазҳабӣ дар Тоҷикистон, ҳодисаи сӯзондани нусхае аз китоби "Қуръон" дар иёлати Флуридои Омрикоро маҳкум кардааст.

Шӯрои сиёсии ин ҳизб бо судури баёнияе сӯзондани китоби муқаддаси мусалмонон тавассути кашише омрикоиро "амале ифротгароёна ва ҷинояти зидди арзишҳои башарӣ" хонда ва ҳушдор додааст, ки ин кор авоқиби ногуворе барои ҷомеъаи байналмилалӣ хоҳад дошт.

Дар ин баёния, ки сойти ҲНИТ рӯзи сешанбеи 5 апрел интишор дод, аз ҷумла омадааст: "Қатли таассуфбори даҳҳо инсони бегуноҳ дар Афғонистон нишонае аз паёмадҳои хушунатбори ин амали таҳрикомез мебошад."

Ин ҳизб меафзояд: "Шакке нест, ки доираҳои мушаххас дар паси ин ҳодисаи нангин истодаанд ва бо даст задан ба эҳсосоти милюнҳо одамон, раванди мӯътадилсозии муносибатҳои байни мусалмонон ва пайравони динҳои дигарро хадшадор кардан мехоҳанд."

Шӯрои сиёсии Ҳизби наҳзати исломии Тоҷикистон ҳамчунин зимни интиқод аз ончи "хомӯшӣ ва вокунишҳои заъифи созмонҳои байналмиллалӣ, кишварҳо ва ниҳодҳои расмӣ" хонда, онҳоро ба "бетафовутӣ ва саҳлангорӣ нисбат ба арзишҳо ва муқаддасоти башарият, бавижа мусалмонон", муттаҳам кардааст.

Дар ниҳоят, ин ҳизб аз мақомоти расмии кишварҳо, созмонҳои байналмилалӣ, бахусус кишварҳо ва созмонҳои исломӣ, даъват кардааст, ки дар ҳамкорӣ бо ҷомеъаи ҷаҳонӣ бо чунин "амалҳои ифротгароёна" муқобала кунанд ва аз такрори чунин ҳаводис дар оянда ҷилавгирӣ намоянд.

Дар вокуниш ба интишори хабари сӯзондани нусхае аз китоби "Қуръон" дар авохири моҳи март дар Омрико тайи рӯзҳои ахир тазоҳуроти густардае дар шаҳрҳои бузурги Афғонистон барпо шудааст.

Рӯзи ҷумъаи гузашта гурӯҳе аз мӯътаризон дар Мазори Шариф ба дафтари СММ дар ин шаҳр ҳамла карда ва чанде аз кормандони онро ба қатл расонданд, ки ҷомеъаи ҷаҳонӣ ин амалро низ маҳкум кардааст.

Би-Би-Си