ИФТИТОҲИ ОСОРХОНАИ УСТОД ҶӮРАБЕК НАЗРӢ

Дар доираи сафари Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмолалӣ Раҳмон ба ноҳияи Ховалинг чанд иншооти фарҳангӣ мавриди баҳрабардорӣ қарор гирифт.

Муҳимтарин падидаи фарҳангии ин сафар ифтитоҳи Осорхонаи устод Ҷӯрабек Назрӣ бо ҳузури мушовири Президенти Ҷумҳурии Тоҷикистон дар умури иҷтимоӣ Эмомалӣ Насриддин ва дигар мақомоти вилояти Хатлон буд.

Осорхонаи устод дар маркази ноҳияи Ховалинг, дар як мавзеи дилрабо бо тарҳи меъмории зебо бунёд шудааст. Дар ошенаи аввал осорхона, коргоҳи дузандагӣ ва дар ошёнаи дувуми он маркази омӯзиши забонҳои хориҷӣ, китобхонаи шахсӣ ва маркази омӯзиши мактаби ҳунарии Ҷӯрабек Назрӣ ҷойгир шудаанд.

Осорхона аз панҷ бахш: бахши фаъолиятҳои илмӣ, корномаи ҳунарӣ, дастовардҳои иҷтимоӣ, бахши Пешво ва бахши хонаводагӣ иборат буда, барои тарбияи насли ҷавон ва равнақи санъати сайёҳӣ дар ноҳияи Ховалинг мусоидат хоҳад кард.

Ҳамзамон дар поёни маросими ифтитоҳи осорхона ёдномаи устод Ҷӯрабек Назрӣ бо номи "Менигарему меравем" ба меҳмонон ва аҳли фарҳангӣ ноҳияи Ховалинг тақдим гардид.