ИМКОНИ МАНЪИ ПАЗИРОИИ МУҲОҶИРОНИ КОРИИ ТОҶИК ДАР РУСИЯ

Раиси Идораи назорат бар иҷрои ҳуқуқи масрафкунандагон ва ҳифзи беҳдории Русия гуфтааст, ки базудӣ мавзӯъи манъи истифода аз нерӯи кори муҳоҷирони тоҷик дар Русия матраҳ хоҳад шуд.

Геннадий Онишенко ин мавзӯъро дар мусоҳиба бо хабаргузории "ИНТЕРФАКС"-и Русия дар ҳоле матраҳ кардааст, ки ба гуфтаи вай ахиран дар миёни муҳоҷирони тоҷик дар Русия мавориди зиёди ибтилоъ ба бемориҳои мусрӣ, аз ҷумла сил ва Эч-Ай-Вӣ ё бемории камбуди масунияти бадан ошкор шудааст.

Оқои Онишенко гуфтааст: “Албатта дар чунин маворид, барои ҷилавгирӣ аз афзоиши ин бемориҳо дар Русия ва то замони беҳбудии вазъи беҳдоштӣ дар Тоҷикистон, манъи комили истифода аз нерӯи кор аз Тоҷикистон матраҳ мешавад.”

Тибқи иттилоъи манобеъи мухталиф, ҳамасола аз 800 ҳазор то якуним милюн нафар аз атбои тоҷик барои дарёфти ҷойи кор ба манотиқи мухталифи Русия сафар мекунанд. Коршиносони Бонки Ҷаҳонӣ мегӯянд, ки маболиғе, ки ин муҳоҷирон ҳамасола ба Тоҷикистон интиқол медиҳанд, муъодили 50 дарсади мизони тавлидоти нохолиси миллӣ дар ин кишвар будааст. Ба эътиқоди коршиносон, ин маблағ омили аслии суботи сиёсӣ, иқтисодӣ ва иҷтимоъӣ дар Тоҷикистон аст.

Ахиран Раҳматулло Зойиров, раиси Ҳизби сусиёл-демукроти Тоҷикистон изҳор дошт, ки дар сурати ихроҷи қисме аз ин муҳоҷирон ба ватан, шиддати бӯҳрони иқтисодӣ дар ин кишвар афзоиш хоҳад ёфт.

Аз сӯйи дигар, бисёре аз соҳибназарони тоҷик бар ин назаранд, ки давлати Русия дар вокуниш ба зиндонӣ шудани халабони рус дар Тоҷикистон мизони фишор бар муҳоҷирони тоҷик дар ин кишварро афзоиш хоҳад дод.

Зимнан, Идораи муҳоҷирати Русия эълом кардааст, ки ҳоло ҳудуди 300 тан аз муҳоҷирони кории тоҷик барои депурт аз ин кишвар омода ҳастанд. Соҳибназарони тоҷик ҳадс мезананд, ки дар чанд рӯзи оянда ин рақам бамаротиб афзоиш хоҳад ёфт.

Аммо, Дмитрий Медведев, раиси ҷумҳурии Русия, дар сӯҳбат бо бархе аз расонаҳои кишвараш боздошт ва ихроҷи муҳоҷирони тоҷик аз Русияро ба қазияи додгоҳии халабони рус дар Тоҷикистон марбут надонистааст. Аз ҷумла, Президент Медведев гуфтааст, ки “ихроҷи даҳҳо муҳоҷирони ғайриқонунӣ аз Русия ба ватанашон танҳо ҳамзамон бо додгоҳи халабонҳо иттифоқ афтодаст.”

Оқои Медведев зимни шарҳи зиндонӣ шудани Владимир Садовничий, халабони рус, гуфтааст, ки ҳалли ин масъала бояд тибқи қавонини Тоҷикистон ва созишномаҳои миёни ин ду кишвар сурат бигирад. Ҳарчанд Дмитрий Медведев афзудааст, ки ҳукми додгоҳ дар қиболи ду халабон то андозае "шубҳанок" аст, вале "ба назари ман ҳамаи муҳоҷироне, ки ҳамвора даст ба нақзи қонун дар Русия мезананд, бояд аз кишвар ихроҷ шаванд.”

Дар ҳамин ҳол, мавзӯъи ихроҷи муҳоҷирони кории тоҷик аз Русия ба ватан муҷиби вокунишҳои мухталифи бархе аз аҳзоби сиёсӣ дар ин кишвар шудааст.