ФЕСТИВАЛИ РАҚС ДАР ДУШАНБЕ АЛАЙҲИ НАШЪАМАНДӢ

Шӯъбаи назорати маводи мухаддир ва тартиботи ҳуқуқии (INL) Сафорати Иёлоти Муттаҳидаи Амрико ва шарики маҳаллӣ ташкилоти ғайридавлатии “Даст ба Даст“ дар таърихи 8 апрели соли 2012 фестивали рақсро дар театри ба номи Маяковскии шаҳри Душанбе баргузор намуданд.

Дар се моҳи охир ташкилоти ғайридавлатии “Даст ба Даст“ хореографҳоро дар омода намудани рақсҳо, ки муборизаи бомуваффақият алайҳи нашъамадиро инъикос мекунанд, ҷалб намудаст. Ҳар як мактаб рақсҳои гуногунро, ки хатари нашъа ва хушиҳои зиндагиро бидуни нашъа таҷассум намудаанд, пешниҳод намуд. Ин лоҳия боз шаш клуби рақсро дар Душанбе таъсис дод.

Мақсади фестивал – баланд бардоштани сатҳи маълумотнокӣ доир ба хатарҳои нашъа ва пешниҳод намудани фаъолияти алтернативӣ барои хонандагон ҷиҳати пеш бурдани ҳаёти солим мебошад. 120 нафар хонандаи шаш мактаби Душанбе аз синни 12 то 17 сола  дар фестивали мазкур иштирок намуданд.

Баъди хатми фестивал ташкилоти ғайридавлатии “Даст ба Даст” таҷҳизоти заруриро ба клубҳои рақс тӯҳфа кард. Мақолаҳо дар мавзӯи фаъолияти лоҳия ва проблемаи нашъа дар Тоҷикистон ба чоп расида, панҷ барнома тариқи радиои Ватан бо мақсади баланд бардоштани маълумот оид ба сӯйистеъмолкунии нашъа ва ташвиқ намудани фестивал, пахш гардиданд.

Мактаббачагони зиёд ҳамроҳи волидонашон ба тамошои фестивали мазкур омаданд. Дар маъракаи мазкур Муовини сафири Сафорати ИМА Сара Пенхьюн  ширкат варзид. Ӯ намоиши кӯдаконро баланд қадрдонӣ намуда, аз волидон даъват ба амал овард, то масъалаҳои мушкилро ба монанди истеъмоли нашъа бо фарзандонашон муҳокима намоянд.

Фестивали рақс қисми барномаи INL доир ба коҳиш додани талабот ба маводи нашъа дар  солҳои 2011-2012 мебошад. Таҳти барномаи мазкур зиёда аз 300,000 доллари амрикоиро ҳамчун грант ба ташкилотҳои ғайридавлатии маҳаллӣ ва байналмиллалӣ, ки чаҳор вилояти Тоҷикистонро дарбар мегирад, ҷудо намудааст.

Аз соли 1992 то инҷониб Сафорати ИМА тақрибан 984 миллион долларро ба барномаҳое, ки фаъолияти институтҳои демократӣ, соҳаҳои тиб ва маориф, рушди иқтисод, бехатарии сарҳад, волоияти қонун ва мубориза бар зидди гардиши ғайриқонунии маводи мухадирро дар Тоҷикистон дастгирӣ менамоянд, ҷудо намудааст.

«Рӯзгор»