Маъруфи Аҳтам ҷавоне, ки чанд сол инҷониб даҳаи ахири рамазонро дар масҷиди назди хонаашон бо эътикоф нишастан паси сар мекунад, имсол низ ният дорад, ки ин даҳаро дар ҷавори раҳмати Илоҳӣ гузаронад. Ба бовари ӯ, эътикоф нишастан танҳо дарёфти лутф ва инояти  чанд рӯзаи Худованд бар банда нест, балки хонаи Худо-табобатгоҳи равониест, ки  метавонад инсонро ба хубӣ муолиҷа намояд. Вай мегӯяд, ба тозагӣ бозёфтҳои таҳқиқотии чанд тан аз табибони мисриро хонда будам, ки онҳо беморони худро бо парҳез ва рӯза гирифтан табобат мекардаанд.

Онҳо ба ин натиҷа расидаанд, ки як  рӯз рӯза гирифатани шахс метавонад даҳ шабона рӯз микроорганизмҳои зараррасонро дар бадани инсон фалаҷ намояд.  Хулоса ин ки  бо як моҳ рӯза гирифтан кас метавонад дар даҳ моҳи боқимонда саломатии худро аз бемориҳои гуногун эмин нигаҳ дорад. Ҳоҷӣ Исмоил Пирмуҳаммадзода  мӯътақид аст, ки эътикофнишастан дар даҳаи охири моҳи мубораки рамазон яке аз суннатҳои муаккадаи Паёмбари Акрам(с) мебошад ва ба қавли Имом Бухорӣ  ҳазрати Муҳаммад (с) дар охирин рамазони ҳаёташон бист рӯзи охири ин моҳро дар масҷид эътикоф нишастааст.

Дар сӯҳбат бо «Имрӯз News» Ҳоҷӣ Исмоил Пирмуҳаммадзода гуфт, ҳарчанд эътикоф ва ё гӯшанишинӣ дар масҷид одоб ва аҳкоми шаръии худро дошта бошад ҳам, шахси эътикофнишин  метавонад тавассути шахси саввум пайгири муомалоти дунёии худ, аз қабили тиҷорат  шуда, ҳамзамон дар меҳмонии Худованд ба розу ниёз гуфтан бо ӯ машғул шавад. Гуфта мешавад эътикофнишинон ба умеди дарёфти шаби қадр, ки савоби он беҳтар аз ибодати ҳазор моҳро дар бар мегирад нуздаҳуми рамазон барои чанд рӯз аз оғӯши гарми хонавода ба меҳмонсарои ҳазрати Хақ ташриф мебаранд, то муҳаббат ва марҳамати Илоҳиро даёфт намоянд.

Дар ҳамин ҳол Беҳрӯзи Мусофир  таҳсилдидаи яке аз донишгоҳҳои исломии хориҷ аз кишвар мегӯяд, пӯшида нест, ки эътикоф беҳикмат буда наметавонад. Имом Буҳорӣ ривоят мекунад, ки ҳазрати Паёмбар(с) дар охирин соли умрашон ду даҳаи ахири рамазонро ба эътикоф нишастаанд боз  ҳам андарзҳое хоҳад дошт, ки то имрӯз мавриди таҳқиқ қарор нагирифтаанд. Ба ҳар ҳол, бо боварӣ гуфта метавонам қариб кулли таърихнависони мусалмон ҳангоми сираи Паёмбарро навиштан тавассути зани яҳудие заҳр додани  ҳазрати Муҳаммадро тасдиқ кардаанд ва худи он Ҳазрат(с) низ се маротиба  аз Худованд шаҳодатро  талаб карда буд.

Вай мегӯяд, агар як рӯзадор аз рӯи имондорӣ  ва подошинтизорӣ рӯза бигарад ва гуноҳони гузаштааш бахшида шаванд, пас чӣ ҷое он ки ҳазрати Муҳаммад(с) ҳам дар зиндагӣ ба орзӯи худ, яъне  шаҳодат нарасад. Гуфтаниям  шояд, бо гирифтани рӯза ва канораҷӯӣ аз оғӯши хонавода он Ҳазрат(с) тавонист ҳамасола таъсири ҳамон заҳри додашударо кам ва микроорганизмҳои зараррасони тани худро фалаҷ намояд. 

Ин ки гуноҳони Паёмбар(с) бахшида шудаанд ва низ бо як моҳ  рӯз гирифтану боз ҳангоми нотавон будани микороорганизмҳои зараррасон дар эътикоф зери соя ва дур аз офтоб ба муолиҷаи равонӣ ва бадании худ машғул шудан ҳам шояд як роҳи пешгирии таъсири заҳри дода шуда  бошаду ин усули табобат ба гирифторони бемориҳои сироятӣ низ раҳнамуди хубе буда тавонад.

Аз нигоҳи тиббӣ мардумӣ низ рӯза гирифтан як намуди парҳез ба ҳисоб рафта, бевосита  дар табобати бемориҳои, ки ба мубодилаи моддаҳо вобастагӣ доранд, фоидаи калон дорад. Барои мисол: бемориҳои фишор, гуфт ба «Имрӯз News» табиби мардумӣ, Махсуми Одина.

Амруллоҳи Низом, «ИмрӯзNews»

Адреси доимии маводи мазкур: http://www.ruzgor.tj/din/3023-2010-09-01-09-11-28.html