КӢ ҲУҚУҚИ ДАР ТОШКАНД ЗИНДАГӢ КАРДАНРО ДОРАД?

Имрӯз, 15-и сентябри соли 2011 раиси ҷумҳури Ӯзбекистон Ислом Каримов қонунеро ба имзо расонд, ки тибқи  он кадом аз қишри аҳолии кишвар ҳуқуқи дар шаҳри Тошканд ва вилояти Тошканд ҳаққи иқомат ва номнавис шуданро доранд, муайян карда мешавад.

Тибқи ин санад ҳақки номнавис шуданро дар маҳдудаи мазкур ашхос ва хешу табори онҳое доранд, ки дар пойтахт ва вилояти Тошканд соҳиби манзилҳои истиқоматӣ мебошанд. Чунин ҳақро инчунин касоне дарёфт карда метавонанд, ки ба мақомоти ҳокимияти давлатӣ (Парламент ва Шӯрои вазирон) ба кор қабул шаванд. Ҳукуматдорон омодаанд, ки ба мутахассисони соҳибкасб ва аҳли оилаи онҳо низ чунин ҳақро бидиҳанд.

Қонун дар бораи ба қайд гирифтани аҳолии пойтахти Ӯзбекистон ва вилояти Тошканд ҳанӯз 14- июли соли ҷорӣ аз  сӯйи Парламенти ҶӮ қабул шуда буд. 26-и  август палатаи болоии Маҷлиси Олии Ӯзбекистон онро тасдиқ намуд. Рӯзи 15-сентябр ин қонунро Президенти Ӯзбекистон ба имзо расонд ва он ҳукми қонунро гирифт.

Масъалаи мазкур аз моҳи январи соли 2011 дар пойтахти Ӯзбекистон масъалаи рӯзмарра ба ҳисоб мерафт. Ҳукуматдорон аз ҳамон давра номнавис кардани шаҳрвандони дигар манотиқи кишварро дар пойтахт ва вилояти Тошканд қатъ карда буданд.

Ба иттилои манбаъҳои ғайрирасмӣ ҳукуматдорон ин иқдомро ба хотири ҷилавгирӣ кардан аз таҷаммӯъи «ҷавонони берун аз назорати ҳукуматдорон» дар арафаи ҷашни 20-солагии Истиқлолияти давлатӣ пиёда кардаанд, хабар медиҳанд сомонаҳои  Podrobno.uz ва Uznews.

«Рӯзгор»