Як маъмури нерӯҳои амниятии Қирғизистон дар бархӯрд бо ҷонибдорони президенти собиқ кушта шуд

Нерӯҳои амниятии Қирғизистон барои боздошти президенти собиқи ин кишвар Алмосбек Отамбоев ба маҳалли сукунати вай юриш бурданд. Ҷонибдорони Отамбоев, ки бо ин нерӯҳо даргир шудаанд, гуфтаанд, ки як маъмур ба зарби тир кушта шудааст. Ахиран парламони Қирғизистон масунияти президенти собиқро лағв кард ва роҳҳоро барои боздошту муҷозоти вай ҳамвор намуд.

Кумитаи давлатии амнияти миллии Қирғизистон гуфтааст, ки дастаи эъзомӣ танҳо бо тирҳои пластикӣ муҷаҳҳаз буд ва рӯзи чаҳоршанбе як амалияти вижаро ҷиҳати боздошти райиси ҷумҳури собиқ роҳандозӣ кард. Кумита ҳамчунин хабар додааст, ки ба муҷарради ба макони Отамбоев наздик шудани маъмурон ҷонибдорони президенти собиқ аз силоҳҳои оташфишон сӯяшон тирандозӣ кардаанд.

Вазорати тандурустии Қирғизистон аз захмӣ шудани 36 нафар дар ин даргириҳо гузориш додааст. Дар баёнияи ин вазорат омадааст: “Як афсари нерӯҳои махсус, ки бар асари исбобати тир захмӣ шуда буд, дар шароити хеле вахим ба бемористон мунтақил шуд, вале бо вуҷуди талошҳои духтурон вай аз олам даргузашт”.

Дар шабакаҳои иҷтимоӣ аксу тасвирҳои зиёде аз ҷараёни даргирии нерӯҳои вижа бо ҷонибдорони Отамбоев чоп шудааст. Дида мешавад, ки роҳҳои вурудӣ тавассути ҷонибдорони Отамбоев масдуд карда шудаанд ва нерӯҳои амниятӣ дар ҳоли тақвияти худ мебошанд.

«Рӯзгор»