Фаъоли ҳизби наҳзати исломиро лату кӯб кардаанд
Афроди номаълум муовини раиси ҳизби наҳзати исломии Тоҷикистонро лату кӯб кардаанд.
Мақомоти Ҳизби Наҳзати Исломии Тоҷикистон мегӯянд, шоми рӯзи ҷумъа тахминан соати 19:40 дақиқаи вақти Душанбе ҳангоми бозгашт ба хона дар маҳаллаи 91-уми пойтахти Тоҷикистон Маҳмадалӣ Ҳаитов-муовини раиси ин ҳизб дар даромадгоҳи манзили зист аз пушт мавриди ҳамлаи афроди ношинос қарор гирифтааст.
Сухангӯи ин ҳизб Ҳикматулло Сайфуллозода ба Радиои Озодӣ гуфт, ки зоҳиран ҳамла бо фаъолиятҳои сиёсии Ҳаитов иртибот дорад. Сайфуллозода афзуд, ки ҳоло Ҳаитов бо ҷароҳатҳо ба бемористони минтақаи Қарияи болои шаҳри Душанбе интиқол ёфтааст.
Ду сол пеш худи сухангӯйи ҳизби наҳзати исломӣ Ҳикматулло Сайфуллозода ҳам дар тақрибан ҳамин хел вазъият дар маҳаллаи 112-уми пойтахти Тоҷикистон лату кӯб шуда буд, вале масъулони ҳамла ёфт то ҳанӯз номаълум ҳастанд.
«Озодӣ»
