ПАРЛУМОНИ КИШВАР ЛОИҲАИ ТАҒЙИРОТ БА ҚОНУН «ДАР БОРАИ ИНТИХОБОТИ ПРЕЗИДЕНТИ ҶТ»-РО БА БАРРАСӢ ГИРИФТ
Дар ҷаласаи навбатии Кумитаи тадорукоти эътилоф барои ислоҳоти демократӣ, ки рӯзи ҷумъаи гузашта дар маҷлисгоҳи Коллегияи адвокатҳои «Сипар» баргузор гардид, раиси ҷаласа Зариф Наимов, раиси Ҳизби Сотсиалисти Тоҷикистон, ҷинои Ғаффоров эълом дошт, ки Шӯрои Маҷлиси Намояндагони Маҷлиси Олии Тоҷикистон Лоиҳаи тағйирот ба Қонуни конститутсионии Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон» рӯзи душанбеи 12-уми ноябри соли 2012 мавриди баррасӣ қарор дод.
Дар натиҷа тасмим гирифта шуд, ки онро барои хулосагирӣ ба Кумитаҳои Маҷлиси Намояндагон ва Ҳукумати Ҷумҳурии Тоҷикистон бифиристанд. Лоиҳаи мазкур дар зарфи ду моҳ дар ин ниҳодҳо мавриди баррасӣ ва муҳокима қарор хоҳад гирифт.
Хотиррасон мекунем, ки Лоиҳаи Қонуни мазкур аз ҷониби Кумитаи тадорукоти эътилоф, ки намояндагони чаҳор ҳизби сиёсии кишвар (ҲНИТ, ҲУСДТ, ҲСТ (ҳарду ҷино), ҲДТ (ҳарду ҷино) ва бархе аз созмонҳои ҷамъиятӣ ва шахсиятҳои маъруфи кишвар аз ҷумлаи ёсатмадорону ҳуқуқшиносон ба он шомил шудаанд, таҳия гардида, 2-юми ноябри соли ҷорӣ тавассути вакилони Ҳизби Наҳзати Исломии Тоҷикистон ба палатаи поёнии Маҷлиси Олии Тоҷикистон барои баррасӣ пешниҳод шудааст.
Дар ин мавзӯъ: ҶАЛАСАИ НАВБАТИИ КУМИТАИ ТАДОРУКОТИ ЭЪТИЛОФ БАРОИ ИСЛОҲОТИ ДЕМОКРАТӢ
«Рӯзгор»