ГЕНЕРАЛ ДЕЙВИД ПЕТРЕУС АЗ РАҲБАРИИ ЦРУ ИСТЕЪФО ДОД
Барак Обама, раисиҷумҳури Амрико, истеъфои генерал Дейвид Петреус аз мақоми раҳбари Созмони иттилоот ё СIA пазируфт.
Генерал Дейвид Петреус, раиси Созмони иттилооти Амрико ё CIA (ЦРУ), ба далели иртиботи номашрӯъяш аз мақоми худ истеъфо додааст. Хабаргузории Ассошиейтед-Пресс навиштааст, генерал Петреус рӯзи панҷшанбеи 8-уми ноябр ба Барак Обама, ки барои чаҳор соли дигар раисиҷумҳури Амрико интихоб гардид, номаи истеъфои худро таслим кардааст.
Ӯ рӯзи ҷумъаи нуҳуми ноябр пас аз дарёфти посухи расмии раисиҷумҳури Амрико гуфт, ки дар “қазовати худ бисёр заиф” амал кардааст. Дар ҳоле ки ба гуфтаи худи ӯ, чунин рафторе ба унвони раҳбари як созмоне чун созмони иттилоот (CIA) ва як ҳамсар ғайри қобили қабул аст.
Барак Обама низ бо судури баёнияе аз хидматҳои Петреус қадрдонӣ карда, ӯро яке аз генералҳои барҷастаи насли худ донистааст, ки ба Артиши Амрико кӯмак кард, то чолишҳои наверо пушти сар гузорад.
Тибқи ин гузориш, раисиҷумҳури Амрико муовини генерал Петреусро ба унвони сарпарасти Созмони иттилооти Амрико таъйин кардааст. Генрал Петруес 37 сол пеш бо Ҳоллӣ Петреус издивоҷ карда буд. Ӯ дар он замон донишҷӯи донишкадаи афсарӣ дар Академияи низомии Иёлоти Муттаҳида буд.
Хабари истеъфои Петреус дар ҳоле мунташир шудааст, ки тайи моҳҳои охир фаъолияти Созмони иттилоот дар ҷараёни ҳодисаи ҳамла ба консулгарии Амрико дар Бенғозӣ, дар моҳи сентябри соли ҷорӣ, ки ба кушта шудани чаҳор амрикоӣ, аз ҷумла сафири Иёлоти Муттаҳида дар Либия сабаб шуд, мавриди интиқод қарор гирифта буд.
«Озодӣ»
