АБДУЛМАҶИД ДОСТИЕВ: “ЯК МӮҲЛАТИ ҚОБИЛИ ҚАБУЛ АСТ”
Сафири Тоҷикистон дар Русия ба хабари имзошавии созишнома оид ба пойгоҳи низомии Русия вокуниш кард.
Рӯзи 5 октябр, дар ҷараёни сафари расмии президенти Русия Владимир Путин ба Душанбе созишномаи пойгоҳи низомии 201 Русия дар хоки Тоҷикистон ба имзо расид. Ин созишнома ҳузури пойгоҳро то соли 2042, яъне ба мӯҳлати то 30 сол дар назар мегирад.
Сафири Тоҷикистон дар Русия Абдулмаҷид Достиев, ки ҳоло дар Душанбе ба сар мебарад, дар сӯҳбати кӯтоҳи телефонӣ бо мо гуфт, ҳанӯз матни комили созишномаи ҳузури пойгоҳи низомии Русия дар хоки Тоҷикистонро “бо чашми худ надидааст”.
Достиев: Варианти охирине, ки ҳамин шаб то рӯз нишаста кор карданд ва ҳоло ба имзо расид, ҳанӯз дар дасти ман нест.
-Роҷеъ ба мӯҳлати тӯлонӣ, яъне то 30 сол ҳузур пайдо кардани пойгоҳи низомии Русия дар хоки Тоҷикистон чӣ назар доред?
-Мӯҳлате, ки мегуфтанд, он нест. Ба фикрам, як мӯҳлати қобили қабул ҳам аз ҷониби мо ва ҳам аз ҷониби онҳо аст. Яъне ба як хулоса омаданд.
«Озодӣ»
