ҚАТЛИ ЯКЕ АЗ НАЗДИКОНИ ПРЕЗИДЕНТ ДАР ДУШАНБЕ
Шаби 13-уми июни соли ҷорӣ шавҳари хоҳарбузурги Эмомалӣ Раҳмон, раисиҷумҳури Тоҷикистон, мавриди ҳамлаи мусаллаҳона қарор гирифта ва дар ҷои ҳодиса ҷон бохтааст. Ин сӯиқасд дар назди манзили Холмӯъмин Сафаров дар наздикии "Автовокзал"-и пойтахт сурат гирифтааст.
Дар ин бора манобеи вазорати умури дохилии Тоҷикистон ба мо иттилоъ доданд. Манобеъ мегӯянд, ба сари шавҳари хоҳарбузурги Эмомалӣ Раҳмон - Холмӯъмин Сафаров, зодаи ноҳияи Восеи вилояти Хатлон, чанд тир холӣ кардаанд, ки дар натиҷа ӯ ба ҳалокат расидааст. Мақомот аз баёни ҷузъиёти бештари ин ҳодиса худдорӣ мекунанд.
Бино ба хабарҳо, Холмӯъмин Сафаров раҳбарии Корхонаи Воҳиди Давлатии "Тоҷикҷангал"-ро бар ӯҳда доштааст. Дар ҳоли ҳозир як гурӯҳи фаврии ҷустуҷӯӣ барои таҳқиқи ин қазия ташкил шудааст. Мақомоти вазорати умури дохилии Тоҷикистон гуфтаанд, ки базудӣ дар ин бора иттилои расмӣ низ пахш хоҳад шуд.
Қатли Холмӯъмин Сафаров дар ҳолест, ки Эмомалӣ Раҳмон, раисиҷумҳури Тоҷикистон, бо як сафари корӣ дар вилояти Суғд қарор дорад ва имрӯз ҷараёни размоиши нерӯҳои Созмони Ҳамкориҳои Шонгҳой дар маҳалли Чоруқдаронро назорат мекунад.
«Озодӣ»