МАҲФИЛИ ЁДБУДИ ШАҲИД АҲМАДШОҲИ МАСЪУД

Шоми 19.09.2011 бо ибтикори «Бунёди баналмилалии Масъуди шаҳид» ва «Анҷумани «Пайванд»-и  Ҷумҳурии Тоҷикистон дар тарабхонаи «Роҳат»-и пойтахт маҳфили ёдбуди шаҳид Аҳмадшоҳи Масъуд  таҳти унвони «Масъуд устурае дар таърихи раҳоии миллатҳост» баргузор гардид, ки дар он аҳли  илму ҳунар, фарҳанг ва намояндагони дигар касбу корҳо аз ҷумлаи тоҷикону афғонҳои муқими шаҳри Душанбе, меҳмонони пойтахт ширкат варзиданд.

Дар ин маҳфил Абдулғафури Орзу- Сафири кабири Ҷумҳурии Исломии Афғонистон дар Тоҷикистон,  Исомиддин Салоҳиддинов- Раиси «Анҷумани «Пайванд»-и Тоҷикистон», Шамсулҳаққи Ориёнфар- вобастаи фарҳангии сафорати ҶИА дар Тоҷикистон, Мӯъмин Қаноат- шоири Халқии Тоҷикистон, Рустами Ваҳҳоб-шоир ва адабиётшинос, Мирзо Шукурзода- нависанда ва муҳаққиқ, оқои Тоҷиддинӣ- шоири эронии муқими Тоҷикистон, Муҳаммад Ғойиб- шоири Халқии Тоҷикистон, Муҳаммад Холиқ- шоир ва донишманди тоҷик, Савлатшоҳи Мерган-  олими афғонистоншиноси тоҷик, Абдуллоҳи Раҳнамо-сиёсатшинос, Ортиқи Қодир, Ҳунарманди Мардумии Тоҷикистон ва дигарон суханронӣ намуда дар он афкор ва ашъори тозаи хешро дар бораи ин   қаҳрамони роҳи озодӣ ва истиқлолияти Афғонистон ва ифтихори тамоми мардуми форснажод иброз доштанд.

Ёдовар мешавем, ки шаҳид Аҳмадшоҳи Масъуд, Қаҳрамони миллии Афғонистон расо даҳ сол пеш дар як ҳамлаи интиҳорие, ки аз сӯйи ба ном «журналистони араб» сурат гирифта буд, ба шаҳодат расид. Ба муносибати 10-солагии шаҳодати ин абармарди таърих имрӯзҳо дар Тоҷикистон дар маҳфилҳои мухталиф аз ӯ ёд намуда ба равони покаш дуруд мефиристанд.

«Рӯзгор»