ҲАЛОКАТИ ЯК МУСАЛЛАҲ ДАР ЗАДУХӮРД

Нерӯҳои Вазорати умури дохилии Тоҷикистон дар як даргирӣ дар канораи шаҳри Душанбе гумонбаршудаи узвият дар Ҳаракати исломии Узбакистонро ба қатл расондаанд.

Намояндаи вазорат ба хабаргузории Франс Пресс гуфтааст, ин шахс бо номи Шавкат Юсуфов ҳангоми боздошт ба кормандони умури дохилӣ оташ кушод ва аз оташи ҷавобӣ кушта шуд. Дар ҳоле ки ин манбаъ ва мақомоти дигари Тоҷикистон Юсуфовро узви Ҳаракати исломии Узбакистон меноманд, тасдиқи ин маълумот аз манобеъи мустақил ғайриимкон аст. Хабаргузориҳо гуфтаанд, даргирӣ дар маҳаллаи Арбоб-хотуни наздикии пойтахти Тоҷикистон ба вуқӯъ пайвастааст.

Ин хабар дар ҳоле мерасад, ки ҳафтаи гузашта мақомоти Тоҷикистон аз поёни як амалиёти густарда зидди гурӯҳҳои ситезаҷӯ дар шарқи кишвар иттилоъ дода буданд.

«Озодӣ»