Густариши ҳамкории Тоҷикистон бо Австрия ва Созмони байналмилалии муҳоҷират баррасӣ шуд

5 август дар шаҳри Авазаи Туркманистон дар ҳошияи Конфронси сеюми Созмони Милали Муттаҳид оид ба кишварҳои рӯ ба тараққии маҳсур дар хушкӣ (LLDC3) мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо котиби давлатии Вазорати федеролии корҳои аврупоӣ ва байналмилалии Австрия Йозеф Шеллҳорн баргузор гардид.

Зимни вохӯрӣ масъалаҳои афзалиятноки рӯзномаи дуҷониба, минтақавӣ ва байналмилалӣ, аз ҷумла густариши минбаъдаи ҳамкории сиёсӣ, тиҷоратӣ-иқтисодӣ ва фарҳангию гуманитарӣ мавриди баррасӣ қарор гирифт.

Ҷонибҳо рағбати худро барои идомаи ҳамкории мутақобили судманди Тоҷикистону Австрия дар соҳаҳои мавриди эҳтимоми тарафайн таъкид доштанд.

Ҳамчунин дар доираи конфронс Сироҷиддин Муҳриддин бо роҳбари Дафтари минтақавии Созмони байналмилалии муҳоҷират барои Аврупо ва Осиёи Марказӣ Артур Эркен вохӯрӣ намуд.

Зимни вохӯрӣ вазъи кунунӣ ва дурнамои рушди ҳамкории Ҷумҳурии Тоҷикистон ва Созмони байналмилалии муҳоҷират мавриди баррасӣ қарор гирифт.

АМИТ «Ховар»