Маҳфили ёдбуди Махсум Олимӣ
Дирӯз, 05.10.2016, дар Кохи Филармонияи давлатии Тоҷикистон ба номи Акашариф Ҷӯраев ба муносибати 60-солагии зодрӯз маҳфили ёдбуди шоири ширинкаломи тоҷик, шаҳиди ҷанги шаҳрвандии Тоҷикистон Махсум Олимӣ баргузор гардид.
Журналист ва ровии хушбаён Абдуқодири Абдуқаҳҳор муҷрии ин барномаи хеле зебо ва рангин буд. Дар бораи осор ва рӯзгори шоир Юнус Юсуфӣ, муовини Раиси Иттифоқи Нависандагони Тоҷикистон, Кароматуллоҳ Мирзоев, Нависандаи Халқии Тоҷикистон, Шаҳриёри Олимӣ, фарзанди шоири марҳум, Абдуғаффори Абдуҷаббор, раиси Дастгоҳи иҷроияи Вазорати фарҳанги ҷумҳурӣ, Қурбон Восеъ олим ва ходими давлатӣ ва дигарон қиссаву нуктаҳои ҷолиберо ироа карданд. Ровиёни хушзабони шеъри ноб аз осори шоири ормонӣ шеърҳои ҷаззоб хонданд.
Хосияти Зарафшонӣ, Ҳунарманди Мардумии Тоҷикистон ва шогирдонаш бо суруду таронаҳои ноби хеш, ки асосан бар матни ашъори Махсум Олимӣ эҷод шуда буданд, ба ҳусни ин маҳфил ҳусни тоза зам карданд.
{gallery width=100 height=100 crop=1 cols=4 counter=0 layout=flow alignment=left}gallery/jashn-2016{/gallery}
«Рӯзгор»