Ашӯр Сафар ба ҷои Надежда Крупская
Дар мактаб-интернати махсуси таҳсилоти асосии рақами 3-и шаҳри Душанбе ба муносибати ба номи шодравон Ашӯр Сафар, Шоири Халқии Тоҷикистон, гузошта шудани яке аз кӯчаҳои маҳаллаи Меҳробод маҳфили ёдбуди ин адиби ширинкалом баргузор гардид.
Дар ин ҳамоиш аҳли зиё, шоирону нависандагон Абдулҳамид Самадов, муовини аввали раиси Иттифоқи нависандагони Тоҷикистон, Камол Насруллоҳ, муовини раиси Иттифоқи нависандагони Тоҷикистон, Гулназар Келдӣ, Шоири Халқии Тоҷикистон, Муҳаммад Ғоиб, Шоири Халқии Тоҷикистон, Саидалӣ Маъмур, Шоири Халқии Тоҷикистон, Алиакбар Абдуллоев, шоир ва намояндагони маҳаллаи Меҳробод ширкат ва суханронӣ намуданд.
Абдулҳамид Самадов дар суханронии хеш аз раҳбарияти ҳукумати шаҳр, ба хусус аз раиси он Муҳаммадсаид Убайдуллоев, ибрози миннатдорӣ намуд, ки ба хотири ҷовидон нигоҳ доштани номи шахсиятҳои маъруфи илму фарҳанг ва адабиёти кишвар ба бархе аз кӯчаҳои шаҳр, ки номҳои арбобони сиёсии даврони шӯравиро доштанд, номи шоирону нависандагони адабиёти тоҷикро мегузоранд. Ҳамин тавр аз ин ба баъд кӯчаи Крупская дар маҳаллаи Меҳробод бо номи Ашӯр Сафар, Шоири халқии Тоҷикистон ёд хоҳад шуд.
Дар поёни ин ҷамъомад Раҳматуллоҳ Ҳошимов, Ҳофизи Халқии Тоҷикистон таронаҳои бар матни шоир Ашӯр Сафар эҷод намудаи хешро иҷро кард, ки писанди тамошобинон гардиданд.
Соҳибқирон Мирзоев, донишҷӯи соли дуввуми факултаи журналистикаи Донишгоҳи Миллии Тоҷикистон