Кашфи се ҷасади шаҳрвандони Тоҷикистон дар Русия

Масъулони Додситонии кулли Русия аз кашфи се ҷасад дар вилояти Ленингради он кишвар хабар дода ва мегӯянд, ки онҳо шаҳрвандони Тоҷикистон будаанд.

Торнамои ин ниҳод рӯзи панҷшанбеи 21 август хабар дод, ки дар робита бо ин воқеъа парвандаи ҷиноӣ боз шуда ва таҳқиқи он идома дорад. Ин аҷсодро, ки яке марду ду тани дигар зан будаанд, соҳиби манзиле, ки онҳо дар он ҷо ба сар мебурданд, рӯзи 20 август дар ноҳияи Кирови ин вилоят пайдо кардааст.

Ин се табаъаи Тоҷикистон дар манзиле дар деҳаи мавсум ба Павлово, воқеъ дар наздикии як роҳи утумубилрав дар ин ноҳия ба сар мебурдаанд. Мақомҳои додситонии Русия мегӯянд, ки кормандони пулис ва додситонӣ ба таҳқиқи ин ҷурм машғуланд.

Ҳамчунин кормандони интизомии Русия машғули шиносоии ҳувияти ин се нафар аз шаҳрвандони Тоҷикистон будаанд. Гумон меравад онҳо муҳоҷирони корие бошанд, ки барои дарёфти кор ба Русия рафтаанд.