Эрон вуруди хориҷиён барои табобатро осон мекунад
Вазорати умури хориҷии Ҷумҳурии Исломии Эрон барои хориҷиёне, ки мехоҳанд дар ин кишвар табобат кунанд, низоми махсуси раводид ҷорӣ хоҳад кард.
Бино ба гуфтаи раиси Созмони мероси фарҳангӣ ва сайёҳии Эрон Муҳаммадалии Наҷафӣ раводиди табобат зудтар ва барои муҳлати зиёдтар дода шуда, арзиши он поинтар хоҳад буд. Барои амалӣ кардани тарҳи мазкур як комиссияи вижа бо ширкати намояндагони вазорати умури дохила, амният, умури хориҷа ва созмони сайёҳии ин кишвар ташкил карда шудааст.
Маврид ба ёдоварист, ки ҳар сол ҳудудан 80 ҳазор нафар аз кишварҳои мухталифи ҷаҳон барои табобат вориди Эрон мешаванд. Ҷумҳурии Исломӣ як кишвари дар минтақа пешрафта дар соҳаи тибб буда, низоми табобати он дар сатҳи муолиҷа дар кишварҳои ғарбист. Ҳатто дар табобати баъзе намуди бемориҳо Эрон аз мамолики Аврупо ва Амрико пештар аст. Ин боз дар ҳолест, ки маблағи хизматрасонии тиббӣ назар ба мамлакатҳои ёдшудаи ғарбӣ хеле поин аст.
«Рӯзгор»
