САФИР ГРОСС БО ДОНИШҶӮЁН ВА РОҲБАРОНИ ҶАВОН ДАР ХОРУҒ ВОМЕХӮРАД

Сафири Иёлоти Муттаҳида Кен Гросс дар якҷоягӣ бо Консули Афғонистон дар шаҳри Хоруғ Абдулҳаким Ҳайдарӣ, Муовини якуми Раиси Вилояти мухтори кӯҳистони Бадахшон Орифшо Исмоилов, Намояндаи доимии Созмони Оғохон оид ба рушд дар Тоҷикистон Мунир Мералӣ, корманди Бахши маълумоти миёнаи Вазорати маориф Зулфия Сафарова, Сафири Фаронса Анри Зиппер де Фабиани ва Сафири Русия Юрий Попов дар маросими хатми Мактаби маълумоти касбӣ ва давомдори (ММКД) Донишгоҳи Осиёи Марказӣ (ДОМ) ширкат варзиданд.

Бори нахуст аст, ки ММКД–ро гурӯҳи шаҳрвандони Афғонистон хатм мекунад. Оҷонсии Амрико оид ба рушди байналмиллалӣ (USAID) таҳсили панҷоҳу ҳашт донишҷӯро дар Мактаби маълумоти касбӣ ва давомдор тибқи Барномаи маълумоти касбӣ-техникӣ дар Бадахшон (БМКТБ) маблағгузорӣ намуд, ки ин иқдоми муштараки USAID ва ДОМ мебошад.

«Маориф барои Ҳукумати Иёлоти Муттаҳидаи Амрико масъалаи афзалиятнок мебошад ва Иқдоми фаромарзӣ қисми муҳими кор ва иштироки мо дар минтақаи Осиёи Марказӣ ба шумор меравад. Пуштибонӣ намудан аз Барномаи маълумоти касбӣ-техникӣ дар Бадахшон барои мо як роҳи муҳими расонидани таъсири бевосита аст ва мо аз дидори ин хатмкунандагони меҳнатдӯсти ҷавон дар маросими имрӯза хурсандем», қайд намуд Сафир Гросс.

Дар доираи ин барнома шаст нафар донишҷӯ аз Вилояти Бадахшони Афғонистон соҳиби идрор барои омӯзиши забони англисӣ, технологияи иттилоотӣ, муҳосибӣ/хазинадорӣ дар ММКД-и Хоруғ гардиданд. Таълим ба забони дарӣ сурат гирифта тамоми барнома ва маводҳои таълимӣ низ бо ин забон омода гардиданд. Илова бар ин, сӣ донишҷӯ омӯзиши худро дар доираи барномаи касбомӯзии техникӣ дар ММКД Хоруғ ба итмом мерасонанд. Барномаи маълумоти касбӣ-техникии бурунмарзӣ дар Бадахшон инчунин барои таъсис додани Идораи Барномаи ММКД дар шаҳри Файзободи Афғонистон кӯмак расонид.

Баъди маросими хатмкунӣ Сафир Гросс ва меҳмонони даъватшуда бо роҳбарони созмонҳои ғайриҳукуматӣ, хабарнигорон, донишҷӯён, роҳбарони ҷамоатҳо ва бо хатмкунандагони барномаҳои ИМА дар идораи Гӯшаи Амрико, ки дар Маркази ҷавонони шаҳри Хоруғ ҷойгир аст, мулоқот намуд. Дар ҷараёни он сафир ба саволҳои иштирокдорон посух дод.

Барномаи фаромарзии маълумоти касбӣ-техникӣ яке аз лоиҳаҳои сершумори ёрирасони Оҷонсии Амрико оид ба рушди байналмиллалӣ (USAID) мебошад. Аз соли 1992 инҷониб Сафорати ИМА дар Душанбе беш аз 900 миллион долларро барои кӯмак ба рушди иқтисодиёт, ниҳодҳои демократӣ, соҳаҳои тандурустӣ ва маорифи Тоҷикистон таъмин намудааст.