ХАБАРИ ҒАСБИ ИСТГОҲИ ОБИ УЗБАКИСТОН РАД ШУД

Идораи марзбонии Тоҷикистон хабари вуруди гурӯҳи шаҳрвандони Тоҷикистон ба истгоҳи обтақсимкунии «Работ»-и Узбакистон, воқеъ дар Конибодомро рад кард. Муслиҳ Имомқулов, як афсари идораи марзбонии Тоҷикистон, гуфт, шаҳрвандони Тоҷикистон ба истгоҳи обтақсимкунии «Работ» ҳуҷум накардаанд. Ба гуфтаи ӯ, дар атрофи ин истгоҳ мардуми маҳаллӣ заминҳои кишт доранд ва ҳаррӯза ба зироатпарварӣ машғӯланд. 

Қаблан хабаргузории русии Регнум бо истинод ба сарчашмаҳои мақомоти Узбакистон иттилое нашр кард, ки тибқи он, гӯиё як гурӯҳи сокинони ноҳияи Конибодом бо роҳнамоии марзбонони тоҷик бе огоҳӣ ба истгоҳи мавсум ба «Работ», ки ба Узбакистон тааллуқ доштааст ворид шудаанд. 

Ба навиштаи Регнум, ин гурӯҳи шаҳрвандон «аз деворҳои истгоҳ лавҳаҳо ва раҳнамоҳои техникӣ бо забони узбакиро кандаанд» ва кормандони онро аз истгоҳ берун кардаанд. 

Истгоҳи обтақсимкунии «Работ» соли 1950 дар ноҳияи Конибодоми Тоҷикистон бунёд шудааст ва тибқи санадҳои дар даврони Шӯравӣ имзошуда, моликияти Узбакистон маҳсуб мешавад. Ин истгоҳ ба тақсимкунии оби дарёҳои кӯҳӣ ва таъмини заминҳои ноҳияи Бешариқи вилояти Фарғонаи Узбакистон бо об машғул аст.

«Озодӣ»