СОЗИШНОМАИ БАЙНИ КЕН ГРОСС ВА САЙМӮМИН ЯТИМОВ
Сафири Иёлоти Муттаҳидаи Амрико Кен Гросс ва Раиси Кумитаи давлатии амнияти миллӣ Саймумин Ятимов Ислоҳоти рақами 11 ба Созишномаи байни Ҳукуматҳои Иёлоти Муттаҳида ва Ҷумҳурии Тоҷикистон дар бораи ҳамкорӣ дар соҳаи назорати маводи мухаддир ва ҳифзи ҳуқуқро ба имзо расониданд.
Тибқи хабари дафтари матбуотии сафорати ИМА дар Тоҷикистон Ҳукумати ИМА ӯҳдадор шудааст, ки тавассути пешниҳоди барномаҳои омӯзишӣ, таҷҳизот, инфрасохтор ва коршиносӣ барои тақвияти амнияти марзҳо, ҳифзи ҳуқуқ ва волоияти қонун дар Тоҷикистон беш аз 7 миллион доллари ИМА ҷудо мекунад.
Кӯмаки мазкур ба иҷроиши раванди ислоҳоти милиса ва татбиқи Стратегияи миллии марзбонии Ҳукумати Тоҷикистон мусоидат мекунад. Он инчунин аз кӯшишҳои Агентии назорати маводи нашъаовари Тоҷикистон пуштибонӣ мекунад ва барои муассисаҳои соҳаи адлияи кишвар омӯзиш доир менамояд ва кӯмаки ташкилотӣ мерасонад.
Бо кӯмаки созмонҳои ғайриҳукуматии маҳалливу байналмиллалӣ он дастгирии кӯшишҳои Тоҷикистонро ҷиҳати мубориза алайҳи хариду фурӯши одамон идома медиҳад. Ҳукумати ИМА омодааст мақомоти ҳифзи ҳуқуқ ва муассисаҳои соҳаи адлияро дастгирӣ намояд ва мунтазири давомдиҳии ҳамкории зич баҳри татбиқи лоиҳаҳои муштараки оянда мебошад.
Бо кӯмаки мазкур Барномаи Сафорати ИМА оид ба назорати маводи мухаддир ва ҳифзи тартиботи ҳуқуқӣ ба мардуми Тоҷикистон аз соли 2003 барои дастгирии соҳаҳои амният ва адлия беш аз 41 миллион доллари ИМА масраф кардааст.
«Рӯзгор»
