«Нақши ӯ дар синаву дар ёдҳост»

Таҳти ҳамин унвон нашриёти «Сино»-и пойтахти Ҷумҳурии Тоҷикистон китоберо ба нашр расондааст, ки мураттибони он устодони Донишгоҳи Миллии Тоҷикистон профессор Мисбоҳиддини Нарзиқул ва дотсент Муҳриддин Низомов мебошанд.

Ҳамон тавре, ки муаллифон дар китоб навиштаанд « ин маҷмӯа фарогири матолибест, ки аз ҷониби шахсиятҳои касбу кори гуногун дар сӯги Арбоби шоистаи илм ва техникаи Тоҷикистон, узви вобасти Академияи илмҳои ҶТ, доктори илмҳои филологӣ, профессор Худоӣ Шарифзода навишта шудаанд. Муаллифон нигоштаҳояшонро дар қолаб ва мавзуъҳои гуногун: сӯгнома, номаи таслият, ҳамдардиҳо ба унвони аъзои хонавода ва шогирдон, пайёмҳои инфиродӣ, марсия ва андешаҳо иншо кардаанд, ки ба тартиб дар ин китоб ҷой дода шудаанд. Ҳамчунон, гузоришҳо аз нишастҳои тахассусӣ оид ба ёдмони устоди равоншод ва ёду хотираи эшон мундариҷаи китобро такмил кардаанд».