Дар марзи Афғонистон 4 марзбони тоҷик рабуда шуд
Дар вилояти Кундуз, воқеъ дар марзи Тоҷикистон бо Афғонистон 4 марзбони тоҷик аз ҷониби гурӯҳи мусаллаҳ рабуда шудаанд.
Сарвар Ҳусайнӣ, сухангӯйи Идораи пулиси вилояти Кундузи Афғонистон ба шабакаи телевизиюни “Ориёно-ТВ” гуфтааст, ки рӯзи шанбеи 20 декабр марзбонони тоҷик замоне аз ҷониби гурӯҳи Толибон дастгир шудаанд, ки дар минтақаи Имом Соҳиби Афғонистон ба буридани дарахтон машғул будаанд.
Оқои Ҳусайнӣ гуфтааст, пулис маҳалли нигаҳдории марзбонони тоҷикро мушаххас карда ва ҳамакнун амалиёт барои озодии онҳо шурӯъ шудааст.
Зимнан, дар моҳи гузашта гурӯҳи Толибон 17 корманди бандари Шерхони вилояти Кундузро рабуда, баъдан бо миёнҷигарии куҳансолони маҳаллӣ 7 нафари онҳо озод шуда буданд. Сарнавишти 10 нафари дигар то ҳол рӯшан нест.
Мақомоти ҳифзи ҳуқуқи Тоҷикистон хабари рабурда шудани мазбонони тоҷик аз сӯйи гурӯҳи Толибонро таъйид карда, аммо аз шарҳи ҷузъиёти ин ҳодиса худдорӣ кардаанд.
Би-Би-Си