Садсолагии Ҳоҷӣ Содиқ баргузор мешавад
Ҳукумати вилояти Суғд як ҳайати вижаро барои омодагӣ ба таҷлили садсолагии зодрӯзи нависандаи тавонои тоҷик Ҳоҷӣ Содиқ таъсис дода ва нақшаи чорабиниҳои гиромидошти адиби шодравонро тасдиқ кардааст. Дар ин бора ба "Рӯзгор" сардори дафтари матбуотии ҳукумати вилоят Илҳоми Ҷамолиён хабар дод.
Манбаъ дар шарҳи қарори ҳукумати вилоят афзуд, ки ҳадаф таблиғи адабиёт ва ҳунари волост, тарбияи ҷавонон дар рӯҳияи ватандӯстӣ ва худшиносии миллӣ ва ошно намудани насли имрӯз ба нақш ва ҷойгоҳи рӯзноманигор ва нависанда Ҳоҷӣ Содиқ дар рушди адабиёт ва журналистикаи муосир мебошад. Илҳоми Ҷамолиён афзуд, ки чорабиниҳои асосӣ дар маркази шаҳри Хуҷанд мегузаранд.
Ҳукумати вилоят ба раёсатҳои маориф ва фарҳанг ва Иттифоқи нависандагони вилоят дастур додааст, ки силсилаи чорабиниҳои ҷашниро бо даъвати ҳампешагон ва ҳамқаламони нависанда аз пойтахти кишвар дар сатҳи баланд баргузор кунанд.
«Рӯзгор»