Базми шеъру суруди Хайрандешу Қурбоналӣ

Дар Хонаи адибони ба номи устод Мирзо Турсунзода дар чаҳорчӯбаи чорабиниҳо ба муносибати иди Наврӯз базми шеъру суруди шоири маъруфи кишвар Хайрандеш ва Ҳунарманди мардумии Тоҷикистон  Қурбоналӣ Раҳмон  баргузор гардид.  

Хайрандеш дар ин маҳфил асосан ашъори ба тозагӣ эҷодкардаи хешро пешкаши аҳли толор кард ва гарм истиқбол шуд. Таронаҳои бар ашъори Хайрандеш сурудаи Қурбоналӣ ва ҳамкоронаш аз ансамбли  ҳунарии «Сомон» бахши аъзами барномаи консертии ин маҳфилро ташкил медод.

Мизбонон ва ширкаткунадагони ин маҳфили бошукӯҳро Шоири Халқии Тоҷикистон Муҳаммад Ғоиб, шоираи хушкаломи тоҷик Ҳадиса Қурбонова бо қироати чанд порча аз ашъори худ табрик гуфтанд.

Олим ва ҳунарманди машҳури кишвар Ҷӯрабек Назрӣ, ки ба Қурбоналӣ Раҳмон ҳаққи устодӣ дорад, бо хоҳиши аҳли толор таронаеро  баъди солҳо дур аз саҳна будан  бо лаҳни ба худ хоси зебояш замзама намуд. Базми шеъру суруд бо ширкати дигар шоирону овозхонҳои кишвар бахшида ба иди Наврӯз дар ҷумҳурӣ идома дорад.

«Рӯзгор»