ЭЪТИРОЗИ ТОҶИРОН ДАР КӮЛОБ

Кормандони бозори техникии «Лола» дар Кӯлоб даст ба эътироз заданд ва дари дӯконҳои худро ба рӯи харидорон бастанд. Эътирози 300 тоҷири ин бозор ба боло бурдани иҷораи ҷойи савдо бастагӣ дорад.

Эътирозгарон соати 8-и имрӯз, 26-уми феврал нахуст назди идораи ҳукумати шаҳри Кӯлоб ҷамъ омаданд, аммо масъулини ҳукумат ба онҳо ваъдаи вохӯрӣ ва шунидани арзашонро дар назди ин бозор доданд. Тоҷирони бозор мегӯянд, дар ҳоле, ки савдои хуб надоранд, соҳиби бозор 20 сомонии дигар иҷораи ҷойи фурӯшашонро дар як моҳ афзоиш додааст, ки ин бар суди онҳо нест.

Нуралӣ Ҳасанов, раиси ин бозори хусусӣ дар назди эътирозгарон гуфт, "ҳаққи иҷораро наметавонад коҳиш диҳад, зеро аз фаъолияти бозор ӯ ҳам андози бештар месупорад."

-Касе мехохад, бо хамин нарх фаъолият кунад, намехоҳад, ҷавоб,- гуфт Ҳасанов.

Дар хамин ҳол Рустам Неъматов, муовини раиси ҳукумати шаҳри Кӯлоб аз норозиён талаб кард, ки бо раиси бозор ҳамдигарфаҳмӣ кунанд: "Ин он қадар гап набудааст, ҳамагӣ дар як мох 20 сомонӣ супурдан чӣ ҳаст? Ҳеҷ мушкил нест, супоред ва савдо кунед, зарар намебинед."

Дар ҳоле, ки эътирозгарон қонеъ нашуда буданд, муовини раиси шаҳр ҳамроҳ бо раиси бозор онҳоро тарк карда буданд.

«Озодӣ»