САФИ ХОНАНДАГОНИ «АДАБИЁТ ВА САНЪАТ» ЗИЁД ШУДААСТ
Ҷаласаи ҳисоботии солонаи ҳафтавори «Адабиёт ва санъат» баргузор гардид, ки дар кори он широну нависандагон, мунаққидон ва бархе аз журналистони дигар расонаҳо ширкат карданд.
Бояд гуфт, ки имсол ин ҷаласаи анъанавии минбари расии эҷодкорони Тоҷикистон дар вазъияте мегузарад, ки аҳли қалами кишвар баъди рӯзҳои башуморе 11-уми марти соли равон 100 солагии ба нашр расидани нахустин шумораи рӯзномаи тоҷикӣ «Бухорои шариф»-ро ҷашн мегиранд.
Сармуҳаррири ҳафтанома, нависандаи маъруф Кароматуллоҳи Мирзо дар бораи фаъолияти яксолаи ҳафтанома дар соли 2011 ба ҳозирин маълумоти мухтасар дод. Бино ба гуфтаи Кароматуллоҳи Мирзо дар соли сипаришуда теъдоди ба 7 ҳазор нусха расид, ки ин дар муқоиса бо ду се соли қабл хеле зиёд аст.
Дар ин кор пеш аз ҳам саҳми кормандони ҳафтанома хеле зиёд аст. Алоқа бо мардум ва сохторҳои ҳукуматии дар маҳалҳо буда мустаҳкамтар шудааст, ки ин дар натиҷа зиёд шудани муштариёни ҳафтаномаро таъмин намудааст. Махсусан сафи муштариён дар минтақаи Рашт ва шаҳри Душанбе хеле зиёд гардид.
Вале дар муқоиса сафи муштариён дар вилояти Суғд хеле ночиз аст. Кароматуллоҳи Мирзо қайд намуд, ки агарчи онҳо ҳанӯз ҳам аз сӯи лавлат маблағгузорӣ мешаванд, вале акнун панҷоҳ дар сади ин маблағ аз ҳисоби фурӯши ҳафтанома пӯшонда мешавад.
Дар ҷаласа нависандаи маъруф Сорбон, шоир Рустами Ваҳҳоб, мунаққиди шинохта Абдунабӣ Сатторзода дар бораи ҳусну қубҳи маводҳои насрӣ, назмӣ ва нақди адабии ҳафтанома бо маърӯзаҳои иловагӣ ибрози андеша намуданд.
«Рӯзгор»