ТАРКИШИ БАЛОНИ ГАЗ ДАР АВТОБУСИ НАҚЛИЁТӢ

Имрӯз, 17-уми феврал, тақрибан соати 3-и баъд аз зӯҳр дар назди бозори марказии шаҳри Қӯрғонтеппа, ки дар наздикиҳои стадиони «Пахтакор»- маркази вилояти Хатлон ҷойгир шудааст, як балони гази автобуси мусофирбари тамғаи ПАЗ, рақами давлатиаш 34-97 В 01 таркид.

Ба гуфтаи шоҳидони айнӣ таркиш вақте ба амал омад, ки тамоми мусофирони автобус онро тарк карда буданд. Дар натиҷаи таркиш, хушбахтона, касе ҳалок ва ё захм набардоштааст. Зарбаи мавҷи таркиш раҳгузареро аз ҷои воқеа дур партофтааст, ки дар натиҷа пояш андаке лат хӯрдааст. Сабаби таркишро шоҳидон  дар дуруст риоя накардани қоидаи бехатарии истифодаи газ арзёбӣ намудаанд.

Дар посух ба саволи хабарнигори сомонаи «Рӯзгор» сабаби инфиҷори балони газ дар нақлиёти мусофиркашонӣ дар чӣ будааст, навбатдори Вазорати корҳои дохила аз ба вуқӯъ омадани чунин воқеа дар шаҳри Қӯрғонтеппа изҳори беиттилоӣ намуд.

Дар зер навори видеоиеро аз ҷои ҳодиса манзуратон мекунем.

«Рӯзгор»