ДАРГИРӢ ДАР МАРЗИ ТОҶИКИСТОНУ ҚИРҒИЗИСТОН

Дар амалиёте дар минтақаи марзии Суғду Ботканд як шаҳрванди Тоҷикистон - Умед Низомов кушта шудааст. Амалиёти ҷилавгирӣ аз қочоқи маводи мухаддир аз ҷониби нерӯҳои интизомии Қирғизистон пас аз зӯҳри дувуми апрел, дар ноҳияи Лайлак, ҳаммарз бо ноҳияи Бобоҷон Ғафуров, дар казинои "Шангри Ла", 25-километрии шаҳри Хуҷанд сурат гирифт.

Ба навиштаи хабаргузориҳо, аз ҷумла "АкиПресс", дар ин амалиёт як пулиси қирғиз ҳам аз захми корд ҷароҳат бардошта ва ба бемористон интиқол ёфтааст. Як манбаи мӯътамад аз мақомоти интизомии Суғд бо тасдиқи ин хабар гуфт, ҷониби Қирғизистон онҳоро аз роҳандозии ин амалиёт огоҳ карда ва дар боздошти як автомобил, ки бидуни рақами давлатӣ аз ҷойи ҳодиса ғайб зад, кӯмак хостааст.

Ба қавли ин манбаъ, кормандони интизомии Қирғизистон гуфтаанд, ки зимни амалиёт як шаҳрванди дигари Тоҷикистон Абдулмаҷид Ғуломносиров, сокини шаҳри Чкаловро бо як кило маводи мухаддир дастгир ва ба шахри Ӯш интиқол додаанд. Ин дар ҳолест, ки манобеи огоҳ аз қазия мегӯянд, ҳадди ақалл панҷ сокини Суғд аз сӯи милисаи қирғиз дастгир шудаанд.

«Озодӣ»