КАШФИ ЯК МАХФИГОҲИ АСЛИҲА ДАР РАШТ

Пулиси Тоҷикистон дар минтақаи Рашт як махфигоҳи аслиҳаро бо миқдори зиёде муҳимоти ҷангӣ кашф кардааст. Тибқи иттилоъи манобеъи пулис, ин махфигоҳ дар рустои Қарашаҳрии ноҳияи Рашт ошкор шудааст. Гуфта мешавад, ки лавозими ҷангӣ дар боми манзили маскунии яке аз сокинони ин деҳа пайдо шудааст.

Маъмурони пулис аз ин махфигоҳ як норинҷакандоз, ду худкори Калашников, 10 адад норинҷак ва чанд бастаи юнифурми (либоси) низомӣ пайдо кардаанд. Зимнан, дар чанд моҳи ахир дар минтақаи Рашт амалиёти ниҳодҳои интизомӣ ва амниятӣ барои боздошти пайкорҷӯёне, ки моҳи сентябр дар дараи Камароб ба комюнҳои вазорати дифоъ ҳамлаи мусаллаҳона анҷом дода буданд, идома дорад. Пулис ҳамчунин аз кашфи махфигоҳи дигаре дар як минтақаи ҳаммарз бо Афғонистон гузориш медиҳад.

Тибқи ин хабар, дар наздикии минтақаи Яхсу, дар ноҳияи Мӯъминободи вилояти Хатлон, махфигоҳе бо 3 норинҷак ва тирдонҳои худкори Калашников пайдо шудааст. Вазорати умури дохилаи Тоҷикистон гузориш додааст, ки аз авоили соли ҷорӣ дар ин кишвар 201 адад худкори Калашников, 130 тапонча, 81 норинҷакандоз ва 462 адад маводди мунфаҷира кашф ва мусодира шудааст.

Би-Би-Си

Адреси доимии маводи мазкур: http://www.ruzgor.tj/news/28-latestnews/4015-2010-12-29-15-03-44.html