Тоҷикистону Кувайт ҳамкориҳои иттилоотиро таҳким мебахшанд

Сафири Тоҷикистон дар Давлати Кувайт аз дафтари рӯзномаи англисизабони «The Times Kuwait» боздид намуда, масъалаи афзоиши пӯшиши хабарии мавзуъҳои марбут ба Тоҷикистонро баррасӣ кард.

Сафири Фавқулода ва Мухтори Ҷумҳурии Тоҷикистон дар Давлати Кувайт Хусрав Нозирӣ аз дафтари рӯзномаи маъруфи англисизабони “The Times Kuwait” боздид ба амал овард. Дар доираи ин ташриф, сафир бо сардабири рӯзнома Ториқ Юсуф Аш-Шумаймирӣ мулоқот намуд.

Тавре ки аз Сафорати Ҷумҳурии Тоҷикистон дар Давлати Кувайт хабар доданд, дар ин дидор роҳҳои густариши ҳамкории расонаӣ, иттилоърасонӣ ва нақши воситаҳои ахбори омма дар бозтоби раванди тавсеаи робитаҳои дӯстӣ ва ҳамкорӣ байни ду кишвар мавриди баррасӣ қарор гирифтанд.

Муҳимтарин меҳварҳои мулоқот ва тавофуқоти расонаӣ:

- Сафири Тоҷикистон ба аҳаммияти муаррифии зарфиятҳои иқтисодӣ, сармоягузорӣ ва ҷозибаҳои гардишгарии (сайёҳии) Тоҷикистон дар расонаҳои Кувайт таъкид намуд.

- Муаррифии мероси ғании фарҳангии халқи тоҷик, инчунин дастовардҳо ва чашмандозҳои ҳамкории ду мамлакат.

- Ҷонибҳо барои тақвияти ҳамкории расонаӣ ва табодули иттилооту муҳтавои хабарӣ изҳори омодагӣ карданд.

Дар анҷоми вохӯрӣ омодагии ҳарду ҷониб барои афзоиши пӯшиши мавзуъҳои марбут ба Тоҷикистон дар фазои иттилоотии Кувайт махсус қайд гардид.

“Рӯзгор”