Тоҷикистону Кувайт тарҳҳои муштараки хайриявиро амалӣ мекунанд

Дар Давлати Кувайт вазъи кунунӣ ва дурнамои ҳамкориҳо ва инчунин амалисозии тарҳҳои хайриявии муштарак мавриди баррасӣ қарор гирифтанд.

Сафири Фавқулода ва Мухтори Ҷумҳурии Тоҷикистон дар Давлати Кувайт Хусрав Нозирӣ бо Вазири авқоф ва умури исломии ин кишвар Муҳаммад Иброҳим Ал-Васмӣ вохӯрӣ намуд.

Тавре ки аз Сафорати Ҷумҳурии Тоҷикистон дар Давлати Кувайт хабар доданд, дар ин вохӯрӣ роҳҳои таҳким ва тавсеаи робитаҳо байни ниҳодҳои дахлдори ду мамлакат дар заминаҳои мавриди эҳтимоми муштарак баррасӣ шуданд.

Самтҳои асосии ҳамкории Душанбе ва Кувайт:

- Густариши ҳамкориҳо дар заминаи амалисозии лоиҳаҳо ва ибтикорҳои хайриявӣ.

- Баргузории конфронсҳо ва ҳамоишҳои муштараки илмӣ.

- Муаррифии саҳму нақши бузурги донишмандони тоҷики Варорӯд дар ғанисозии тамаддуни исломӣ.

Ҷонибҳо дар рафти суҳбат ба аҳаммияти пойбандӣ ба усули миёнаравӣ ва эътидол дар ислом махсус таъкид карданд.

“Рӯзгор”