ВАЗИРИ ДИФОЪ: "МО БА ҲАР ГУНА ПЕШОМАД ОМОДАЕМ"
Леон Панетта, вазири дифои Амрико гуфт, кишвараш барои муқобила бо ҳаргуна чолиши эҳтимолӣ аз сӯи Эрон омодааст. Ӯ рӯзи чаҳоршанбе дар Вашингтон гуфт, артиши Амрико дар Халиҷи Форс ба қадри кофӣ нерӯ дорад, то ба ҳаргуна талоши Эрон барои бастани гулӯгоҳи Ҳурмуз муқовимат кунад. Аз тариқи ин гулӯгоҳ сеяки нафти бозорҳои ҷаҳонӣ мегузарад ва бо тақвияти таҳримҳои иқтисодӣ алайҳи барномаҳои атомии Эрон, Теҳрон таҳдид кардааст, ки ин гӯлугоҳро мебандад.
Вазири дифои Амрико гуфт, ки "мо ҳузури қавии худро пайваста дар Халиҷи Форс нигаҳ доштаем, то нишон диҳем, ки барои ҳифзи субот дар ин гӯшаи ҷаҳон ҳар кори мумкинро мекунем. Мо ҳамеша худро барои ҳаргуна пешомад омода кардаем, вале дар ҳоли ҳозир ба хотири рафъи пешомад, ҳеҷ иқдоми вижае нагирифтаем, зеро мо комилан барои ин кор омодаем."
Иёлоти Муттаҳидаи Амрико чанде пеш яке аз киштиҳои бузурги ҳавопаймобар ва киштиҳои ҳамроҳи онро ба Халиҷи Форс фиристод, ки ба гуфтаи мақомоти расмӣ, бахше аз чархиши оддии нерӯҳо дар ин минтақа аст.
Танга ё гулӯгоҳи Ҳурмуз ҳамагӣ 54 километр бар дошта, халиҷи Форсро бо халиҷи Уммон ва ҳамин тариқ, ба уқёнуси Ҳинд мепайвандад. Обҳои ин гулӯгоҳ дар шимол марзи Эронро ва дар ҷануб марзҳои Уммону Имороти муттаҳидаи Арабро мешӯянд.
«Озодӣ»
