Китобфурӯшии Симурғ ба фаъолият шуруъ кард
«Китобфурӯшии Симурғ» чунин ном дорад мағозаи китобфурӯшие, ки ҳафтаи гузашта дар яке аз толорҳои барҳавои Китобхонаи Миллии Тоҷикистон ба кор шурӯъ кард. Муассиси ин китобфурӯшӣ Шаҳобуддини Шуҷоъ, олими шинохтаи тоҷик, соҳиби нашриёти хусусии «Бухоро» мебошад.
Носирҷон Салимов, директори Китобхонаи Миллии Тоҷикистон ва Гулназар Келдӣ, Шоири Халқии Тоҷикистон ҳозиринро бо кушодашавии боз як маркази нури маърифат табрику муборакбод гуфта орзу намуданд, ки китобфурӯшии мазкур дар роҳи рушду инкишофи маънавии миллат, махсусан насли навраси он, корҳои шоёну муфидеро анҷом бидиҳад.
Шаҳобуддини Шуҷоъ дар сӯҳбат бо хабарнигори «Рӯзгор» иброз дошт, ки феълан китобфурӯшӣ дорои беш аз 30 ҳазор нусха китоб аст, ки онҳо тамоми мавзуъҳои ҳаёти имрӯзаро дарбар мегиранд. Дар ин мағоза китобҳое ба фурӯш гузошта шудаанд, ки дар хориҷ аз кишвар низ ба табъ расидаанд.
Китобфурӯшӣ дар барномаи кории худ гузаронидани вохӯрӣ бо адибон, рӯнамоии китобҳо, ва дигар чорабиниҳои фарҳангиро ба нақша гирифтааст.
«Рӯзгор»