Ҳамкориҳо бо бонки Рушди АвруОсиё баррасӣ шуданд
Бино ба иттилои дафтари матбуотии вазорати рушди иқтисод ва савдои Тоҷикистон Шариф Раҳимзода бо Рашид Қодиров, роҳбари Намояндагии Бонки рушди АвруОсиё дар Тоҷикистон, масъалаҳои энергетика ва саноат ва рушди соҳибкории хусусӣ ва сармоягузории хориҷиро мавриди баҳсу баррас қарор доданд.
Манбаъ мегӯяд вазири рушди иқтисод ва савдо Рашид Қодировро ба муносибати интихоб шуданаш ба мақоми роҳбари Намояндагии Бонки рушди АвруОсиё дар Тоҷикистон табрик намуда, изҳори боварӣ намудааст, ки минбаъд ҳамкории бонки мазкур бо вазорату идораҳои марбутаи Тоҷикистон сатҳу сифати навро касб хоҳад кард.
Аз сӯи дигар Рашид Қодиров омодагии худро ҷиҳати мусоидат ба рушду нумӯи соҳаҳои мухталифи иқтисоди миллӣ изҳор доштааст. Инчунин, дар ҷараёни вохӯрӣ самтҳои дигари ҳамкориҳои иқтисодии барои тарафайн судманд мавриди арзёбӣ қарор гирифтанд.