ҶАШНВОРАИ ФИЛМҲОИ МУСТАНАДИ БИ-БИ-СӢ ДАР ТОҶИКИСТОН
Аз 30 август то 2-юми сентябр дар шаҳри Душанбе ҷашнвораи филмҳои мустанади Би-Би-сӣ ба забони форсӣ баргузор мегардад. Содиқи Сабо, раиси бахши форсии Би-Би-сӣ дар як нишасти матбуотӣ, ки дар толори Иттиҳодияи рӯзноманигорони Тоҷикистон баргузор гардид, ҳадафи ин чорабиниро муаррифии фаъолиятҳои сервиси ҷаҳонии Би-Си-сӣ ва таҷлил аз 20 соли гузоришгарии ин родию дар Тоҷикистон унвон кард.
Дар оғози суханронии худ оқои Содиқи Сабо аз марҳум Муҳиддини Олимпур, нахустин гузоришгари Би-Би-сӣ дар Тоҷикистон, ки соли 1995 ба шаҳодат расид, ба некӣ ёдовар шуд. Сипас ӯ дар бораи таърихчаи ба фаъолият шурӯъ кардани бахши форсии Би-Би-сӣ ва пахши барномаҳои он барои Тоҷикистон маълумоти мухтасаре ироа кард.
Дар бораи ҷашнвораи қарибалвуқӯъ иброз дошт, ки дар он дарназар аст панҷ филми мустанади дар ин авохир таҳиянамудаи синамогарони Би-Би-сӣ ба намоиш гузошта шавад. Инҳо филмҳои «Фарзандони Ленин», «Ҷони Дилафрӯз», «Умари Хайём», «Духтарони писарпӯш» ва «Ислом дар Амрико» мебошанд.
Филмҳоро хоҳишмандон аз 30 август то дуввуми сентябр дар Хонаи Синамои Иттифоқи синамогарони Тоҷикистон (собиқ кинотеатри ба номи Зебуннисо) метавонанд тамошо кунанд. Дар чаҳорчӯбаи ҳамин ҷашнвора инчунин консерти овозхон ва оҳангсози маъруф кишвар Далер Назаров, ки оҳангҳояш дар филми «Фарзандони Ленин» истифода шудааст, баргузор мегардад.
Дар нишасти матбуотии Содиқи Сабо рӯзноманигорни тоҷик, ки аз васоити ахбори давлатӣ ва хусусӣ намояндагӣ мекарданд, ба саволҳои сершумори худ посух гирифтанд.
«Рӯзгор»