ЗИЛЗИЛА ДАР ШИМОЛУ ҒАРБИ ЭРОН ҶОНИ 250 ТАНРО ГИРИФТ
Ду заминларза дар Озарбойҷони Шарқӣ, шимолу ғарби Эрон, ҷони 250 нафарро рабуда, беш аз 2 ҳазор танро захмӣ кардааст. Бино ба охирин гузоришҳо, шумори кушташудагони заминларзаи Озарбойҷони Шарқӣ, шимолу ғарби Ҷумҳурии Исломии Эрон, ба 250 нафар расида, шумори захмиҳо аз 2 ҳазор тан гузаштааст. Ин дар ҳолест, ки гуфта мешавад, иддае ҳанӯз дар зери овор ё вайронаҳо мондаанд.
Баъд аз зӯҳри рӯзи шанбе, 11-уми август, заминларзае баробар ба 6,4 дараҷаи Рихтер шаҳристони Оҳар ва Варазқон дар вилояти Озарбойҷони Шарқиро такон дод. Фармондори Варазқон аз тахриби комили дувоздаҳ русто ё деҳаи ин шаҳристон ва кушта шудани тақрибан чиҳил дарсади сокинони он рустоҳо хабар додааст. То кунун амалиёти ҷустуҷӯӣ ва имдодрасонӣ ба осебдидагони ин зилзила идома дорад.
Ба гузориши хабаргузории ИРНА, Аҳмад Довудоғлу, вазири умури хориҷии Туркия, дар тамоси телефонӣ бо ҳамтои эронии худ Алӣ Акбар Солеҳӣ зимни таслият ба бозмондагони ин заминларза омодагии кишварашро барои ирсоли ҳама гуна кӯмак ба осебдидадгон эълон кардааст.
Бино ба ин гузориш, масъулони Имороти Муттаҳидаи Арабӣ низ бо ибрози таассуф ва эълони ҳамдардӣ бо хонаводаҳои осебдида, омодагии худро барои кӯмак ба зилзидадагон баён доштаанд. Инчунин, вазорати умури хориҷии Иёлоти Муттаҳида ҳамдардии Вошингтон ба осебдидагони зилзила дар Эронро изҳор кардааст.
«Озодӣ»