МУҲОҶИРАТИ МЕҲНАТИИ НОБОЛИҒОН ДАР ҲОЛИ АФЗОИШ АСТ

Дар шаш моҳи соли ҷорӣ беш аз 29 ҳазор ноболиғ аз Тоҷикистон ба муҳоҷирати меҳнатӣ сафар намудаанд, ки ба қавли бархе аз соҳибназарон  ин омил барои кишвар пайомадҳои манфиеро ба миён меорад. Бино ба иттилои Хадамоти муҳоҷирати Тоҷикистон соли гузашта 50 ҳазор ноболиғ кишварро ба хотири муҳоҷирати меҳнатӣ тарк намуда буданд.

Яъне сафари ноболиғон ба муҳоҷирати меҳнатӣ дар ҳоли афзоиш ёфтан аст. Масъулини Хадамоти муҳоҷират низ аз раванди муҳоҷирати ноболиғон ба кишварҳои хориҷа, хусусан ба Русия изҳори нигаронӣ намуда, иброз медоранд, ки падару модари муҳоҷирони ноболиғ, ки дар айёми мактабхонӣ фарзандашонро ба муҳоҷират фиристодаанд ва ё минбаъд мефиристанд, бояд сари ин масъала ҷиддӣ амал намоянд.

Вале иддае аз коршиносон бар ин назаранд, ки дар ин самт болотар аз ҳама бояд Хадамоти муҳоҷирати Тоҷикистон дар якҷоягӣ бо Вазорати маорифи кишвар як барномаи вижае рӯи даст дошта бошанд, ки ҷиҳати танзими муҳоҷирони ноболиғ ба хориҷи кишвар мусоидат намояд.

Ба қавли ин гурӯҳ коршиносон дар сурати идома ёфтани сафари ноболиғон ба муҳоҷирати корӣ ва дур мондани онҳо аз омузиш масъалаи бесаводӣ дар Тоҷикистон ба проблемаи №1 табдил хоҳад ёфт.

Темур Раҷабализода, «Рӯзгор»