Сафири тозатаъини Олмон нусхаи эътиборнома супурд

21 августи соли 2019 Сафири навтаъйини фавқулодда ва мухтори Ҷумҳурии Федеративии Олмон дар Ҷумҳурии Тоҷикистон Андреас Протманн нусхаи Эътимодномаи худро ба муовини вазири корҳои хориҷии Ҷумҳурии Тоҷикистон Музаффар Ҳусейнзода супорид.

Бино ба гузориши дафтари матбуотии Вазорати корҳои хориҷии Тоҷикистон зимни мулоқоте, ки баъд аз маросими эътимодномасупорӣ сурат гирифт, ҷонибҳо оид ба ҳолати кунунӣ ва дурнамои  ҳамкории Ҷумҳурии Тоҷикистон ва Ҷумҳурии Федеративии Германия гуфтугӯи судманд намуданд.

Дар анҷоми вохӯрӣ муовини вазири корҳои хориҷии Ҷумҳурии Тоҷикистон Музаффар Ҳусейнзода ба Сафири навтаъйини фавқулодда ва мухтори Ҷумҳурии Федеративии Олмон дар Ҷумҳурии Тоҷикистон Андреас Протманн барои анҷоми рисолати дипломатиаш муваффақият орзу намуд.  

Маврид ба ёдоварист, ки муносибатҳои дипломатӣ миёни Ҷумҳурии Тоҷикистон ва Ҷумҳурии Федеративии Олмон моҳи декабри соли 1992 барқарор шуданд. То ба имрӯз байни Тоҷикистон ва Олмон 40 санади ҳамкориҳои дуҷониба ба имзо расидааст. Аз ин 30 санадро созишномаҳои байниҳукуматӣ ташкил медиҳад, 9 санад созишномаҳои байниидоравӣ ва 1 санад изҳороти муштарак мебошад.

«Рӯзгор»