Озмуни “Зебосанам-2019” – и ширкати ватании “Тоҷик кристал” аз имрӯз шурӯъ гардид

Ширкати «Тоҷик Кристалл» мегӯяд бахшида Солҳои рушди деҳот, сайёҳӣ ва ҳунарҳои мардумӣ бо дастгирии Ҳукумати Ҷумҳурии Тоҷикистон озмуни ҷумҳуриявии “Зебосанам-2019”-ро баргузор хоҳад кард. Ин ширкат ахиран эълон кард, ки даври аввали ин озмун имрӯз, 6-уми август дар шаҳрҳои Хуҷанд, Бохтар, Кӯлоб, Хоруғ доир мешавад ва даври дуюм ва ниҳоии он моҳи ноябр дар шаҳри Душанбе ба нақша гирифта шудааст.

Ҳадаф аз гузаронидани озмун - эҳёи анъанаҳои мардумӣ, таблиғи либосҳои миллӣ, тарғиби ҳунармандӣ дар байни ҷавондухтарон, бахусус интихоб ва пӯшидани либосҳои миллӣ, оро додани рӯю мӯй, тарзи дурусти истифодаи ҷавоҳирот аз ҷониби гулдухтарон, арҷгузорӣ ба анъанаҳои миллӣ, баланд бардоштани маърифати сиёсиву фарҳангии ҷавондухтарон ва ҳидояти онҳо барои бунёди оилаи солиму баркамол мебошад.

Ширкат ин шартҳоро барои ширкаткунандагон ҳатмӣ донистааст:

муаррифии ҳусни зебоии табиӣ;

эҷодкорӣ;

санъатварӣ;

малакаи суханварӣ;

маҳорати либоспӯшӣ ва зоҳир шудан дар саҳна;

ҳаракатҳои мавзун;

маҳорати андешаронӣ;

фарҳанги зебоипарастӣ ва ҳунарнамоӣ.

«Рӯзгор»